KHAWTHLIR

MIFCO chairman-in NEC Secy. a kawm

MIFCO chairman PC Zoram Sangliana, MLA chuan nimin khan Shillong-ah NEC secretary Ram Muivah a kâwm. Kolasib bial chhunga hmalakna hrang hranga NEC fund hman
ṭangkai dan tur a sawipui a; Mizoram state priority list-a mi 'Multi Utility Centre with Auditorium' Kolasiba sakna tur NEC-in project sanction tur zinga a la telh lo chu ngai pawimawh hmasa turin a ngen.

Mi pasarih man

Aizawl traffic police-te leh Aizawl district Anti Tobacco Squad (ATS)-te ṭangkawp chuan nimin khan Aizawla sumdawnna lirtheite endikin, COTPA an bawhchhiat leh bawhchhiat loh an enfiah. Joint operation-ah hian taxi, maxicab leh city bus-te endik niin, lirthei khalhtu leh passenger dan bawh-chhia mi pasarih an man a, pawisa an chhawitir nghal. Joint operation chhunzawm an tum a ni.

S.A tawngtai

Salvation Army (SA) India Eastern Territory Centenary Celebration Prayer & Counceling Sub-Committee buatsaih, 'Ṭawngṭai Khawmpui' chu Kolasib (Western Division)-ah neih mek a ni. SA kum 100 lawmna tur pual hian hmun hrang hrangah 'Tawngtai Khawmpui' hi kalpui mek zel a ni.

Health clinic hawng

Parliamentary secretary KS Thanga chuan nimin khan a bial chhung, Kelsih khuaa Health Clinic building thar a hawng. KS Thanga chuan, Health Clinic building chu Kelsih khua mai ni lo, a chhehvel khuate tan pawh malsawmna a nih ngei a beisei thu a sawi.

Loneitute zirtir

Champhai district KVK chuan Ningani khan Chalrang leh New Chalrang khuaa sawhthing chíngtute sawhthing tám tur ven dan leh a enkawl dan an zirtir a, sawhthing tám tur vênna damdawi a thlawnin sem nghal.

Thing enkawl

MNF ṭhalai, Lunglei sub-headquarters chuan nimin khan social works hun hmangin, nikuma Lunglei leh Haulawng inkar kawngpui kama thing an phun tawhnate sâmfai leh hung ṭhat hnatlang an nei a, thing ṭiak an phun belh nghal.