ACH-ah Kayakalp chungchang inzirtir

Nimin khan Aizawl Civil Hospital confe-rence hall-ah damdawi-in faina leh kawng hrang hranga hmasawnna tur programe Kayakalp sawihona leh Dissemination of Guideline 2016-2017 inzirtirna neih a ni a, Health principal director Dr K Ropari'n a hmanpui.

Kayakalp awareness workshop hi state nodal officer Dr R Lalchhuanawma'n a kaihruai. Dr K Ropari chuan, Kayakalp chu district tinte damdawi-in faina kawnga inelna a nih avangin thawktute theihtawp chhuah turin a chah a, "Kan damdawi-inte a mawi a, a fai deuh deuh theih nan te, damlote dawnsawn kawngahte ṭan kan lak sauh sauh a ngai," a ti a; damlote tan dawr nuam tak nih tum turin thawktute a chah.

National Health Mission (NHM) mission director Dr K Lalbiakzuala pawhin thu sawiin, "Ngaihdan thar leh thil thar ṭha zawk duan chhuah kawngah ṭan lak a ngai. District tinte'n damdawi-in ṭha ber, fai ber, thianghlim ber ni turin ṭan la thar ila, hmasawnna ropui tak kan hmu ngei ang," a ti.

Workshop-ah hian Dr R Lalchhuanawma'n Kayakalp awmzia leh kalphung a sawi a; Quality Assurance-a state consultant (PH) Dr Evelyn Lalremsangi Hmar-in Kayakalp
aṭanga lawmman dawn theih dan leh tehfungte a sawi thung.

Kayakalp hi kum 2015-ah Mizoramah kalpui ṭan niin, nikum lamah chuan district hospital chauh huamtir a ni a, kuminah chuan district hospital bakah, CHC leh PHC zawng zawng a huam tawh dawn.

Kayakalp hnuaiah hian damdawi fai, thianghlim, bawlhhlawh sawngbawl dan, kalphung felfai dante enfiah ṭhin niin, lawmman ṭha tak siam a ni a; lawmman atan hian state lianah district hospital ṭha berin Rs. 50,00,000, a dawttuin Rs. 20,00,000 an dawng thei a, PHC ti ṭha berin Rs. 2,00,000 an dawng thei bawk.