West Tuipui-ah Mizo ngei candidate duh

Mizo Zirlai Pawl (MZP) sub-headquarters, Tlabung huaihawta nimina Tlabunga MZP, YMA, MHIP leh MUP hruaitute ṭhukhawm chuan, kum 2018 Assem-bly inthlanpuiah West Tuipui bial candidate atan Zo hnahthlak ngei dah turin political party tin an ngen.

Tlabunga NGO hruai-tu kalkhawmte chuan, West Tuipui biala Mizo ngei MLA candidate-a dah a nih theih nana MZP-in hma a lak tawhna chu an thlawp thu an sawi a, "A hlawhtlin ngei theih nan theihtawp chhuaha nawr zui zel ni se," an ti. Ram leh hnam humhalh a ṭul thu sawiin, "Zo hnahthlak ngei MLA-a kan neih theihna tura hmalak hi ram leh hnam humhalhna chi khat a ni," an ti bawk.

Tlabunga NGO-te chuan, Tlabung leh Lunglei inkar kawngpui chu a chhe hle tih sawiin, a rang thei ang bera siam ṭhat an phût thu an puang bawk a, "Kum khat dawn maxicab-te lehlángin an service tawh lo a, kawng chhiat vanga mipuite tawrhna hi sutkian a nih theih nan hma min laksak thuai turin thuneitute kan ngen a ni," an ti.

NGO hruaitute sawi danin, Tlabung leh Lunglei inkar kawngpui hi km. 97-a thui a ni a, kawng a chhiat avangin darkar 7-8 vel tlân a ngai a ni.