Police SI training zo mi 18-te thlah

July 21, 2016 khan Police Training School (PTS), Thenzawlah Mizoram police-a unarmed branch sub-inspector (SI) pre-promotion course third batch training zo mi 18-te thlahna hun hman a ni a, IGP Zorammawia'n a hmanpui.

Valedictory function hi PTS principal Lalbiaktluanga'n a kaihruai a, chief drill instructor Zochama leh chief law instructor Lalbiaka Zote ten report an pe. IGP Zorammawia chuan, police zingah mipui khawih leh nghengtu bertu chu inspector leh sub-inspector-te an nih thu sawiin, "An thawh ṭhat leh chhiatah police hmingṭhat leh hmingchhiat a innghat thûk bik a ni," tiin, kawng engkimah ṭan la turin a fuih.

Zorammawia chuan, police-te chu mipui vanga awm, mipui rawngbawl tura din an ni tih sawiin, "Mipui tichî-âi a, tithlabár a, a ngeiawm zawnga kan awm a thiang lo. Mizoram police-te miin an nuihzatna lai tireh a, police zingah zu vanga thi an tlem theih nan physical fitness lamah ṭan nasa zawka lak mek a ni," a ti.

Police SI pre-promotion course training zote hi district hrang hrang aṭanga kal khawm an ni a, police SI 20-te'n May 2, 2016-ah an training ṭan a, rokhawlhna vangin mi pahnihin training an zo ve thei lo a, mi 18-in ṭha takin training an zo a ni.

PTS-ah hian SI pre-promotion course training ṭum thu neih tawh niin, mi 109 an training zo tawh a; tun hnai khan computer hmanga silai kah zirna (simulator) an nei thar a ni.