KHAWTHLIR

September 26, Inrinni khan Aizawl Civil Hospital (ACH) tan mi 136-in thisen an pe a, Synod Hospital tan mi 58-in an pe bawk. Synod Hospital tana petute chu KṬP aṭangin - Dinthar Vengthlang Branch unit 23 (mipa 19 & hmeichhia 4), Ramhlun Sports Complex Branch unit 19 (M-16 & H-3) leh, Ramhlun Vengchung Branch unit 16 (M-15 & H-1) an ni a; ACH tana pete chu - Reiek Branch YMA unit 68 (M-59 & H-90), Adventist Youth Federation unit 51 (M-43 & H-9) leh, Chawnpui Unit TKP unit 17 (M-13 & H-4) an ni.

Greater Kolasib Water Supply Pump House, Tuichhuahen panna kawng, km. 1.1-a thui chu September 25, 2020 tlai khan PHE engineer-in-chief Lalmuanzova’n a hawng. Greater Kolasib WSS hi March 20, 1999-a hman ṭan a ni. A panna kawng chu lirthei tan zawh a harsat avangin June 8, 2020 aṭangin siamthat ṭan a ni a, cheng nuai 32.21 sêngin plain cement concrete  leh reinforced cement concrete-a siam a ni.

Nimin khan Champhai District Sports & Youth Office (DSYO) bultumin district jail-ah rilru leh taksa hrisel siam kawnga inzirtirna Cardio and Fitness Training Session buatsaih a ni. Fitness trainer-te’n jail tangte Cardio and Fitness Training Session an neihpui.

Nimin khan State Referral Hospital-ah Covid-19 vei mi pahnih dah luh an ni a, anni nen hian SRH-ah hripui vei enkawl mek mi 21 an awm a, an zinga pahnih chu ICU-ah enkawl an ni. SRH-ZMC Bulletin chuan, ICU-a enkawlte chu ngaihtuahawm an nih loh thu leh, Isolation Ward leh NICU-a awmte'n harsatna lian tham an neih loh thu a tarlang.

Rashtriya Uchchatar Shiksha Abhiyan (RUSA)hnuaia college zirtirtute chuan kumin May thla aṭang khan hlawh an la la lo niin vanglaini chuan thu a dawng a, RUSA hnuaia assistant professor-te chuan an mangan thu an sawi.