World Tourism Day hman a ni

World Tourism Day 2020 chu nimin khan hmun hrang hrangah hman a ni a, Mizoramah pawh North Eastern Council (NEC) huaihawtin ‘Virtual Platform’ kaltlanga hman a ni.

World Tourism Day pual hian Tourism minister Robert Romawia Royte chuan thuchah a sawi a, "Tourism hi khawpuiah chauh ni lo, thingtlang lamah pawh eizawnna tling a ni thei. Tourism sector hi ram hmasawnna tura sector pawimawh tak a nih avangin hlamchhiah theih a ni lo. Mizoram ‘Happiest state in India’ kan ni hi a lawmawm hle a, Mizoram inpho chhuahna leh khualzinte hîpna hmanraw ṭangkai tak a ni thei," a ti.

Kumina World Tourism Day thupui chu 'Tourism and rural development’ a ni a, tourism industry leh thingtlang hmasawnna kal kawptir a, tourism aṭanga a hlâwk thei ang bera thingtlang mipuite'n eizawnna an neih chu United Nations World Tourism Organizations (UNWTO)-in a duh a ni.

Kumina World Tourism Day hi Pathianni a nih avangin Mizoramah a hranpaa hman a ni lo a, NEC-in ‘Virtual Fest’ neiin, hmarchhak state hrang hrangte tourism lama an hmalaknate pho chhuahsak an ni a, Union Home minister Amit Shah khuallian a ni.

Virtual Fest-ah hian Mizoram aṭangin chief minister Zoramthanga leh Tourism minister Robert Romawia Royte-te chu CMO conference hall aṭangin an tel. World Tourism Day 2020 hi September 27-30 chhung hman turin NEC-in a duang a, September 29  hian Mizoram chu ‘Focus state’ tur a nih angin, chief minister Zoramthanga hoa hman a ni ang.