Screening point sakna tur enfiah

Minister of state K Lalrinliana chuan September 26, Inrinni khan state páwn aṭanga Bairabi-a lirthei lut tur enkawltute endikna screening point thar sakna tur hmun a enfiah a; bul ṭan nan Bairabi Village Task Force (VTF) hnenah Rs. 20,000 a hlân.

K Lalrinliana chuan, Bairabia medical team leh VTF hruaitute kâwmin, Covid-19 donaa an thawhrimna leh inpeknaah lawmthu a hrilh. Bairabi VTF hruaitute'n an lo thlen tawh angin, screening point chu mihring chenna awm lohna hmunah sawn tura hmalak a nih theih nan a bul ṭan nan Rs. 20,000 a pe nghal a ni.

Medical team-te'n thawktu indaih lohna an lo thlen chungchangah K Lalrinliana chuan, Health Minister a sawipui tawh thu a sawi a, "Rang taka hmalak a ni ang," a ti. Kolasib-a Health department hotute sawi danin, Bairabi screening point enkawl tur hian medical officer pakhat leh laboratory technician pahnih an awm a, thermal scanner hmangin mi 13,813 enfiah a ni tawh. September 12, 2020 aṭangin Rapid Antigen Test tih ṭan a ni a, mi 446 endik tawh a ni.