Health Minister-in rei lo têah sample lak tawh endik zawh theih a nih beisei

Health & Family Welfare minister Dr R Lalthangliana chuan September 26, Inrinni khan ZMC Covid-19 laboratory-a swab sample endik hna thawktute tan thei chi hrang hrang leh theitui ṭhahnem tak a pe. Minister chuan, ni rei lo têah sample lakkhawm sa endik zawh theih beisei a nih thu a sawi.

Health Minister chuan, Covid-19 lêng karah ZMC laboratory-a thawkte'n hripui vei zawn chhuah hna a thim a vár pawh thlu loin, rim taka swab sample test hna an thawk chu an chhuanawm a tih thu a sawi a, "ZMC laboratory-a thawkte inpekna hian hripui léng karah Zo nun ze mawi hmuh theihin a rawn par chhuahtir hi a ropui hle. Sample la khawmtute leh contact tracing team-te thawhrimna leh inpekna pawh a hlu a, Zo fate rohlu tlawmngaihna tak tak thinlung pu chung lo chuan mi nazawng tan tlin chi a ni pawhin a lang lo," a ti.

Swab sample lak tawh, endikna result chhuak mai thei lo, hun eng emaw chen nghah ngai ṭhin chu hrethiam hram turin Dr R Lalthangliana chuan mipui a ngen nawn a, "Swab sample lâk tur a tam a, thawktute an indaih lo. Chhun zan zawmin an thawk char char a, theihtawp an chhuah tak meuh a ni tih i hrethiam hrâm hrâm ang u. Ni rei lote chhungin lak khawm sa (backlog) zawng zawng test zawh kan inbeisei," a ti a; test result nghaktute'n dawhthei taka an nghah ṭhin avangin lawmthu a sawi nghal a ni.