Khaw pangaah BPL an awm lo BPL ni lo, BPL-a inziak lutte an hnawk: Planning Secy

Khawzawl RD Block chhunga khaw panga - Riangtlei, Pâmchung, Rabung, Tlângmawi leh Chawngtlâi khuaah below poverty line (BPL) chhungkua an awm lo. Hetih lai hian, Planning secretary Dr C Vanlalramsanga chuan, BPL ni si lo, BPL-a inziak lutte chu BPL tak tak tan an hnawksak tih a sawi.

Mizoram sorkarin BPL base-line survey a nei mek a, Riangtlei, Pâmchung, Rabung, Tlângmawi leh Chawngtlâi khuaahte chuan BPL chhungkua an awm lo tih Champhai DRDA Project Director CC Lalchuangkima chuan a sawi.

Champhai DRDA project director chuan, "Pàmchung phei chu motor kawng pawh a ṭhat lohna a ni a, BPL an awm lo tih kan hriat hian min barakhaih zawk hial a ni," a ti a; khawtlang hruaitute'n 'BPL awm loh vanga chàn ngai a awm a nih pawhin kan chán mai tur a ni' an tih thu a sawi.

Pamchung VCP C Lalzar-liana chuan, BPL an awm loh chhan chu, a tehfung aṭangin tling zo an awm lo tih a sawi a, "Sum leh paiah nei lé lú kan awm lo a, harsa tak tak kan ni. Mahse, an tehfung kan en khan mi ṭhenkhat chu an in leh lo
aṭanga tehin BPL ni thei mah se, tehfung dang aṭangin an tling zo leh chuang lo a, tling lo na nâ nâ BPL nih ṭâlh hi a dik loin kan hria a ni," a ti. Pàmchung hi in 72 awmna khua a ni a, di in-a cheng pahnih an la awm.

Chawngtlai VCP Denthanga chuan, BPL enfiah turin MHIP leh MUP-te nen hma an lakho thu te, chhungkaw harsa zual awm mah se, a tehfung hrang hranga an teh hnuah BPL awm theia an hriat loh avangin an awm ta lo tih a sawi.

Denthanga sawi danin, Chawngtlaiah hian in 370 a awm a, job card nei mi 356 an awm. Di in pathum a la awm a, di in neite chu mi pangngai ve tak an nih avang leh thil dangah an tlin loh avangin BPL ni thei loah an ngai. Chhungkaw harsa zuala ngaihte pawh lirthei nei lo mah se, fridge, washing machine-te an lo neih si avangin tehfungah an tling lo a ni.

Rabung VCP H Lalawmmeka chuan an khuaa BPL awm loh chhan zawhna chhangin, "July 22 khan endiktu an lo kal a, VC-te leh Committee lam hian chhungkaw harsa deuh nia kan ngaih chhungkaw pali kan lo kawhhmuh a, mahse, tehfung aṭangin an tling bik chuang lo. An lo kal takah chuan kan lo kawhhmuh a, endiktute hian engmah an sawi zui chuang lo," a ti. Rabungah hian chhungkaw 354 awmin, job card nei mi 337 an awm a; biak-in leh sikulte nen in ding lai 370 a awm thung.

Planning & Implementaion secretary Dr C Vanlalramsanga chuan, sorkarin khaw hrang hranga BPL baseline survey a neih mek chu uluk taka an kalpui thu sawiin, "BPL ni miah lo, BPL anga inziak lut an lo awm ṭhin avangin heng mite hi BPL tak tak tan an hnawksak hle a ni," a ti.

BPL tehfung aṭangin sorkar hnathawk hrim hrim chu minimum wages aia sang an hlawh vek avangin an tel thei lo tih sawiin, survey neih mekah tun hmaa kalphung ang emaw la ti an awm ṭhin avangin DC-te chu an endiktir nawn leh dawn tih a sawi.

Vanglaini palai zawhna chhangin Dr C Vanlalramsanga chuan, BPL baseline survey neih mek chu a háwl kim thei ang bera siam tum a nih thu te, kalphung thar angin khaw pakhatah a zat lam sawi loin BPL tehfung an siam ang zela felfai taka thlan a nih thute sawiin, "Rethei dik tak zawn chhuahna tur a ni," a ti.

Planning Secretary sawi dan-in, BPL survey neih mek hi March 2016-a ṭan niin, kumin September thlaa zawh hman tum a ni a; chhungkaw sum lak luh leh an nunphung chu tehfung pawimawhte zinga mi a ni. Tehfung chi hrang hrang an siam zinga a langsar zualte chu - wa-shing machine, TV, air conditioner leh two wheeler-te zinga pathum nei an awm chuan BPL-ah chhiar theih an ni lo.

Chenna in maurâp, a chung di leh a bang dâp emaw, ṭín chhia hmanga in bang neite chu tehfung chi khat a ni a; ram zau tak a neih te, in leh lo ṭha tak RCC building leh eizawnna ngêlnghet neite chu BPL-ah an tel thei lo. Sorkar hnathawkte an tel thei lo bawk.