YMA duty-te'n gas bûr 45 an man

Central YMA hnuaia Kumpuan duty-te chuan, July 22, 2016 zan khan Khamrang leh a chhehvelah eirawngbawlna gas khawih chingpen leh a rûka zawrh bûr 45 an man.

CYMA Kumpuan duty-te hian an thu dawn bawhzuiin, Mualkhang leh Khamrang chhehvelah dan loa gas zuar
ṭhin leh khawih chingpen chíngte an dap leh a ni. Gas bur an mante chu Chhingi, New Khamrang hnen aṭangin bûr ruak pariat; Ramchhani, Mualkhang hnen aṭangin bûr ruak pakhat leh a tak awm bûr 18; Nunhlima, Mualkhang hnen atangin a bûr ruak 12 leh a tak awm bûr paruk a ni.

YMA Kumpuan duty-te hian gas khawih ching-pen an man bakah, Mualkhang Gas Bottling Plant aṭanga July 22-a phur chhuah, Khuma Gas Agency, Lawngtlai Chandmary-a dah tur leh Siaha MIZOFED Gas Agency-a dah tur, challan-a inziak zat leh an bûr phurh inmil lote an hrènsak bawk.

Hetih lai hian, YMA Kumpuan duty-te'n a hma lama gas phur truck
ṭhenkhat, an gas phurh an khawih chingpen vanga gas bûr an hrênsakte chuan tun thlengin Mualkhang Bottling Plant aṭangin gas an la thei tawh lo nia sawi a ni.

Kumpuan duty-te chuan, gas phurh khawih chingpen ṭhin truck driver leh hnam dang mite'n Mualkhang leh a chhehvel khuaah Mizo thurual-pui an neih deuh vek a, dan lova gas hralh rûk chhuichhuah kawngah harsatna an tawh phah tih an sawi a; an thurualpui Mizote nen a hlâwkna an insem ṭhin nia an hriat thu an sawi bawk.