CM Hawla'n Myanmar rama an hmalakna Tichak turin External Affairs Minister a ngen

Delhi-a châm mek chief minister Lal Thanhawla chuan, tun hnai khan Union External Affairs minister Sushma Swaraj chu a pisaah a hmu a, sorkar laipuiin Myanmar-a a hmalaknate chak zawka kalpui turin a ngen.

Chief Minister chuan April 2016-a Myanmar-a a zin ṭuma a thil hmuh hrang hrangte sawiin, India leh Myanmar inkar-a inlaichinna ṭha zawk a awm theihna kawng hrang hranga hmalakna awm thei nia a hriatte External Affairs Minister a hrilh.

China-in Myanmar-ah hmalakna pawimawh ṭhahnem tak a nei mek a tih sawiin CM Hawla chuan, "Chak taka tuna China hmalakna hian nakin zelah India leh Myanmar ramriah inepna boruak ṭha lo a thlen thei a, India tan harsatna lian tak a la siam thei dawn a ni," a ti.

Lal Thanhawla chuan, China inlâk lenna veng turin Myanmar-a hma-laknate India-in a tihchak a pawimawh tih sawiin, "Myanmar mipui pawhin India nen thawhhona
ṭha neih an phûrpuiin an thlâwp hle," a ti a; Mynamar mipuite inhawnna chu hman ṭangkai a pawimawh thu a sawi.

Chief Minister chuan, Myanmar ramah Zo hnah-thlak tam tak an awm thu leh an Parliament-ah pawh Zo hnahthlak MP 25 an awm tih sawiin, "Myan-mar-a Zo hnah-thlak leh Mizoram mipuite inkara inunauna leh inlaichinna boruak ṭha a awm a, hei hi ram pahnihte in-
ṭhian ṭhatna kawnga thil
ṭangkai tak a ni," a ti.

Ramria insumdawn tawnna chungchang sawi Hawla chuan, "Ramria sumdawnna ruhrel buatsaihna kawngah tun aia chak zawka hmalak a
ṭul," a ti a; Zokhawthara Land Custom Station chu hman theih a nih tawh thu leh, World Bank sum hmangin Champhai-Zokhawthar kawng zauh leh siam ṭhat hna thawh mek a nih thu Sushma Swaraj hi a hrilh.

CM Hawla chuan, India lamah chuan eng emaw chen ruhrel leh kawng ṭhate kan nei tawh tih sawiin, "Myanmar lama kawngte a la ṭhat loh avangin keini zawk hian kan hlâwkna tur ngaihtuah zelin an ramah hemi kawngah hian hma kan lak a ngai a ni," a ti.

Mizoram sorkarin Myanmar lamah ramri depa kawng 2/3 vel chu chei a duh thu sawiin Chief Minister chuan, kawng chei hna chu thawk thuai thei tura phalna pe turin External Affairs Minister a ngen.

Chief Minister chuan Khampat Bûngpui chanchin pawimawhna sawiin, "He bûng hian Mizo history-ah hmun pawimawh tak a luah a, kum 1700 velah kan pipute'n Mizo insuih-khawmna atan an phun a ni," ti a; Khampat Bûng-pui chu humhalh a nih theih nan a ṭul anga Myan-mar sorkar ráwn chunga hma laksak turin Union Minister a ngen a ni.