KHAWTHLIR

Thisen pe

Inrinni khan Tuikual Branch KṬP-in Aizawl Civil Hospital tan unit 43 an pe a, a petute mipa 37 leh hmeichhia paruk an ni a; Khawbel Student Union member mipa 16 leh hmeichhia pahnihte'n unit 18 an pe bawk. Tuikhuahtlang Branch YMA-in YMA Day pualin Synod Hospital tan thisen unit 27 an pe a, a petute mipa 23 leh hmeichhia pali an ni. Lunglei Ramthar Veng branch KṬP pawhin Lunglei Civil Hospital tan unit 23 an pe a, a petute mipa 22 leh hmeichhia pakhat an ni.

'Ethel' tlangzarh

'Ethel' tih lehkhabu chu Inrinni khan parliamentary secretary Joseph Lalhimpuia'n IPR Auditorium-ah a tlangzarh. 'Ethel' tih lehkhabu hi Ethel Zotluangpuii, Hlimen, cancer natna vei mek ṭanpuina tura ṭhangthar ziaktu mi 24-te thuziak dahkhawmna a ni a; essay, fiction leh poetry hrang hrang a awm.

JNV zirlai bo

JNV, Kolasib-a zirlai pakhat, Shanawaz s/o Abdul Kalam Laskar chu July 19, 2016 zing dar 7:30 vela a chhuah hnuah tun thlengin a awmna hriat a ni lo a, amah âwm ang hmu leh a awmna chin hriate chu police station hnai berah emaw, telephone no. 03837-268754-ah emaw hriatir turin an ngen. Shanawaz hi ft. 5.6 vela sang a ni.

Health clinic

Champhai DRDA bultumin July 22, 2016 khan Rabung khuaah free mobile health clinic buatsaih a ni a, bialtu MLA TT Zothansanga'n a hmanpui. Free clinic-ah hian Champhai District Hospital-a thawkte'n mi 330-te hriselna dinhmun an endik a, a thlawnin damdawi an sem nghal. Rabung hi TT Zothansanga'n model village atana a thlan a ni.

Tanpuina sem

Mizoram Baptist Kohhran hnuaia Relief & Development Department chuan, tunlai hian khaw hrang hranga thli leh ruah, kangmei leh tam tuarte tan chhawmdawlna atan silpauline, thosilen leh buhfai an sem.