NIT Mizoram-in convocation an hmang

National Institute of Technology (NIT), Mizoram chuan Inrinni khan Mizoram University auditorium-ah convocation hmasa ber an hmang a, Governor Lt.Gen. Nirbhay Sharma-a'n a hmanpui.

Governor chuan, NIT, Mizoramin convocation vawi khatna an hmang thei chu lawmawm a tih thu sawiin, "Mizoramin technological college ṭha ber zinga chhâl theih NIT a nei hi a vanneihthlak hle. Mizo mipuiin kan hlut a ngai a a, Mizo zirlai a tam thei ang ber an luh theih nan tuna pawl 12 zir mekte hian JEE (MAIN) paltlang thei turin an inpuahchah a ngai," a ti.

Mizoram leilung hausa mahse a chhunga cheng, mipui an la rethei tih sawiin Larsap chuan, "Kan retheihna ata min chawi kâng turin science thiamna aia pawimawh a awm chuang lo," a ti a; ram hmasawnna atana science zirna dah pawimawh a ṭul thu a sawi.

Governor chuan, engineering degree nei thar ṭhalaite chu hna zawng rilru pu loin, mahni kutkea dinchhuah leh bul ṭan intihhmuh turin a fuih a, "Mi dang tana eizawnna hna siamtu nih an tum chuan tun aia nasa zawkin kan ram hian hma a sawn ka ring," a ti.

NIT, Mizoram convocation vawi khatnaah hian mi 108 hnenah engineering degree hlan a ni a; degree nei tharte chu 2010 leh 2011 batch engineering zirlaite niin, an zir zawh hma aṭanga hna thawh tur zawrh leh an zir chhuah hnua hna hmu nghal deuh vek an ni.

NIT, Mizoramah hian course tinah seat 30 zel a awm a, chung zinga 50% chu Mizoram chhung mi leh sa, Joint Entrance Examination (JEE) Main paltlangte tana hauhsak a ni.