Serchhip YMA-in kawng enfiah

YMA sub-headquarters, Serchhip hnuaia Vigilance & Monitoring Committee member-te chuan, Inrinni khan Tantia Constructions-in Serchhip Sailiamkawn leh Buarpui inkar kawng an siam mek leh Thenzawl-Zote kawng RCC-a siam mek an enfiah a; duhthusam lo laite siam ṭhat leh dan tur contractor-te nen an sawiho.

Serchhip YMA Vigilance & Monitoring Committee hruaitute sawi danin, Serchhip Sailiamkawn - Buarpui kawng siam mek chu fûr lai a nih avangin leimin a awm fo a, chu chuan kawng a tihpin a, mi tam takin harsatna an tawh phah ṭhin avangin kawng siamtu Tantia Constructions general manager PK Sharma chu Inrinni khan Thenzawla a pisaah an kawm a; ruahtui tlak tam ní chuan JCB duty tir a, helpline-te siam turin an ngen.

PK Sharma pawhin YMA ngenna angin Mat camp-a an engineer Kamal Kapur-a chu mawhphurtuah a dah nghal a, Kamal Kapur-a phone number 9856436104-ah emaw, Mat lui kama Tantia camp phone no. 8974131704-ah emaw Thenzawl-Buarpui kawng siam meka leimin a awm chuan hriattir zel turin mi tin a ngen. Report a awm chuan, kawng tipingtu chu thenfai nghal zel a nih tur thu a sawi.

Serchhip-Thenzawl-Buarpui kawngpui hi Asian Development Bank (ADB) aṭanga sum hmuh cheng vbc. 204 hmangin Tantia Constructions-in December 2015 aṭangin an siam ṭan a, zawh hun tura ruahman chu December 2017 a ni.

Thenzawl-Zote kawng chu PMGSY sum hmanga siam a ni a, km. 13.6-a thui niin, a siam nana sum ruahman chu cheng nuai 1,200 zet a ni. Nayak Infrastructure company, Guwahati-te'n an siam a, PWD Aibawk Division-in an enkawl. February 2014-ah hna ṭan niin, December 2015-a zawh tura tih a ni a, tun dinhmunah 60% vel thawh zawh a ni tawh. Siam zawh hun tura ruata thawh zawh a nih loh chhan chu, running bill an lak mumal loh vang niin contractor chuan a sawi.

Thenzawl-Zote kawnga

Serchhip YMA, contractor leh

PWD aiawhte inremna

1. Zote kawng siam mek hêlna tur July 30, 2016 ral hmain contractor-in lirthei eng chi pawh kaltlang thei turin siam se.

2. Kawng siamna atan balu ṭha hman ni se, balu chhêk sa zinga a ṭha lo awm hi August 15, 2016 ral hmain senghawi ni se.

3. Chak lehzuala hna thawh a nih theih nan thawktu tam zawk leh hmanraw changtlung zawk contractor-in ngaihtuah se.

4. Hmun remchang laiah a tam thei ang passing place siam ni se.

5. Tui ṭha taka pek ni se.

6. Kawng siam zawh tawh duhthusam lo laite July 25, 2016 aṭangin trial pad thawh ṭan ni se.

7. Contractor-in running bill a lak ṭhat theih loh vangin hnathawh a chak thei lo nia hriat a ni a, thuneitu sang lamah Sub-Hqrs. YMA-in lo thlen se.