Chakma district din tum kan dodal dawn: MNF

MNF chuan thuchhuah siamin, Mizoram sorkarin district thar siam leh a awm sa tihdanglam chungchang ngaihtuahtu tur District Re-Organisation Committee a dinte meeting agenda-ah Kamalanagar/Chawngte district siam thar a tel tih an tarlang a, "Chakma district siam tum hi a ṭul angin kan dodal dawn," an ti.

MNF chuan, kum 1972-ah Congress sorkar laipuiin Mizo mipuite inrin hmain Chakma Autonomous District Council (CADC) a piantir thu sawiin, "Vawiin thlengin Mizo mipui mit timîmtu a la ni. Kawng hrang hrangin ṭhiah leh tuma beih ni mah se, harsatna tam tak a awm tawh avangin, ram mipui rilru a na ngawih ngawih a ni," an ti a; Congress party chuan Chakma awm tamna Chawngte leh Tlabung bial chu bial hima an neih kumkhua tawh thu an sawi.

Mizorama Chakmate chu mihring inthlah chhâwn dan phung piah lamin an pung chak nia sawiin MNF chuan, "Chakma-te hi Bangladesh aṭangin an lo lut ru ṭhin tih pawh a chiang. Anmahni hnampui birth registration buaipuitute hmangin birth certifcate an nei thei a, hmun danga mihring pun dan rate aia an pun chak chhan zir chianna leh dan bawhchhiatnate enfel tum lo a, district thar neihtir tuma tintuah mek a ni hi ram leh hnam tan a him mawlh lo a ni," an ti.

MNF tarlan danin, Lal Thanhawla chief minister a nih lai, kum 1997-ah Rajya Sabha Petition Committee hnena Chakma hruaitu ṭhenkhatin union terittory (UT) an lo dil tawh a, Central YMA huaihawtin duh lohna nasa tak lantir a nih hnuah thâwm a reh zui a ni.