Aadhaar pek chhuah chak a nih theih nana hma la turin Hawla'n PM a ngen

Chief minister Lal Thanhawla chuan, Mizoramah Aadhaar card pek chhuah a muan vangin Mizo mipuite'n harsatna an tawh thu nimin khan prime minister Narendra Modi hnenah ziakin a thlen a; pek chhuah chak a nih theihna atan hma la turin a ngen.

Chief Minister chuan Prime Minister hnenah hian Mizorama Aadhaar card nei an la tlem avangin scheme hrang hrang, a bik takin scholarship leh eirawngbawlna gas-a subsidy dawn turah Mizoram mipuiin harsatna an tawh loh nan Bio Metric Enrolment inziah luhna leh Aadhaar pek chhuah kawngah chak taka hmalak sak turin a ngen a ni.

March 31, 2016 thlenga Mizo-ram puma Aadhaar pek chhuahna atana National Population Register zûlzuia Bio Metric Enrolment (BME) tih tawh zawng zawng chu mihring zat aṭanga chhûtin 58% vel chauh a la nih thu tarlangin CM Hawla chuan, "Aadhaar pek chhuah a la tlem lehzual. BME leh Aadhaar hian mipui tam tak huam a la hmabak a ni," a ti.

Chief Minister chuan, Mizo-ramin harsatna a neih ngaihtuahin tun dinhmunah chuan BME-a inziah luh zawh hmain sorkar laipui ruahmanna leh scheme, a bikin LPG subsidy leh UGC scholarship leh fellowship dawnna turah Mizoram tan chuan Aadhaar nena thlun zawm vek theih a la nih loh thu Prime Minister a hrilh.

BME-ah inziah luh hna zawh a nih thei nan Prime Minister chu a buaipuitu atana mawhphurhna pek Registrar General of India (RGI) thuneitute a ṭul anga amahin thu peksak turin a ngen a, "Aadhaar leh DBT-a Prime Minister kaihhruaina hnuaia May 5-a meeting-a DBT pek chhuahna scheme-a Aadhaar thlunzawm tih kim hun December 31, 2016 tih leh DBT hnuaia hamṭhatna leh ruahman zawng zawngte thlun zawm kim hun March 31, 2017 tia thurel lo awm tawhah hian Mizoram chu hun pek belh kan ngai a ni," a ti.

BME chu a rang thei ang bera zawh a nih a, DBT chu mi tinin an chhawr thei nan RGI leh a rawih agency-te chu theitawp chhuahin state sorkarin a ṭawiawm tur thu CM chuan PM a hrilh.

CM chuan, Ministry of Human Resources Development-in UGC hnenah kum 2016-17 aṭanga scholarship leh fellowship pek chhuahnaah Aadhaar thlunzawm tur tih thupek a chhuah chu state sorkar leh nodal department-in theihtawp an chhuah chungin Mizoramah chuan tihfel theih a la nih loh thu a tarlang.

NPR zûlzuia BME-a inziah luh leh Aadhaar pek chhuah hna hi Mizo-ramah chuan October 5, 2013 aṭanga kalpui ṭan niin, he hna kalpui tur hian Registrar General of India-in Electronics Corporation of India Limited (ECIL) chu registrar atan a ruat.

ECIL hian Mizorama he hna buaipui turin Kolkata-a firm pahnih - LYRA leh ISS-te a ruai a, kumin March 30 khan BME-a inziah luh leh Aadhaar pek chhuah zawh hman tura beisei an nih laiin mipui tam tak an la inziak lut thei lo.

RGI-in March 31, 2017 thleng BME atan hun a pawtsei chungin mi tam tak chu BME-ah an la inziak lut lo a, April 1, 2016 aṭanga khan NPR zûlzuia BME kalpui hi a tawp rih a ni.