Thingtlang hmasawnna tur scheme sawiho

State Level Empowered Committee (SLEC) chu nimin khan chief secretary Lalmal-sawma hoin Aijal Club conference hall-ah an ṭhukhawm a; Shyama Prasad Mukherjee Rurban Mission (SPMRM) hnuaia thingtlang khua tih-hmasawnna tur Integrated Cluster Action Plan (ICAP) chungchang an sawiho.

ICAP-in a tum ber chu, thingtlang khaw hrang hrang, inhnaih tê têa awmte a hlawm (cluster)-a lain, an mamawhte zir chian hnuah a changtlung thei ang bera chei ṭhat tum a ni. Sorkar laipui hmalakna ICAP atan hian India ram pumah khaw 300 thlan chhuah tur a ni a, a thawh khatna atan khaw 100 thlan chhuah phawt tur niin, Mizoramah chuan Aibawk RD Block thlan a ni.

Aibawk cluster hian Aibawk RD Block chhunga khaw 11 - Melriat, Falkawn, Muallung-thu, Kelsih, Aibawk, Sateek, Phulpui, Maubuang, Thiak, Sumsuih leh Tachhip a huam.

ICAP buaipui tur hian Catalyst Solutions, Chaltlang thlan an ni a, Aibawk RD cluster-a khaw 11-te hmasawnna tur mamawh hrang hrang zir chianna neih a nih hnuah, an khaw mamawh a zir zelin SPMRM kalpui tur a ni. Department hrang hrangte’n anmahni puala scheme a hranga an thawh ṭhin chu heng khua bikah hian kaikawpin hmasawnna hna thawh a ni ang.

Department scheme kaihkawp hmanga hma-lakte tihlawhtling turin sum indaih lohna a awm chuan Critical Gap Funding hmanga hnawh khah tur a ni. Critical Gap Funding aṭanga sum hmuh theih zat hi project pumpui senso tur ruahman (project cost) aṭanga 30% emaw, a aia hniam tur a ni.