Grassroots Football Development-a Ambassador atan Jeje-a ruat a ni

SSA, TATA Trust leh MFA chuan Grassroots Football Development Programme an kalpui mekah ambassador atan Jeje Lalpekhlua an ruat. Nimin khan Mizo High School hall-ah lawm luhna hun hman niin, parliamentary secretary Joseph Lalhimpuia'n a hmanpui.

Joseph Lalhimpuia chuan, SSA hnuaia grassroot football aca-demy 60-ah naupang 3,000 an awm mek tih sawiin, "Naupangte hi nakin lawkah India rama Mizote tihmingṭhatu an nih kan beisei," a ti a; ambassador atana an ruat Jeje Lalpekhlua thawhrimna Pathianin mal a sawm tih sawiin, amah anga awm thei turin zirlaite a chah.

Jeje Lalpekhlua chuan, naupangte chu sorkar hmalakna avanga an têt lai aṭanga football an zir thei chu vannei a tih thu a sawi a, "Hlawhtling turin thawhrim leh thuawih a ngai a, coach-te thuawih a pawimawh. Football khel chungin lehkhathiam a nih theih a, hmun danga awm dawnin ṭawng thiam a ṭul," a ti.

MFA honorary secretary Lalnghinglova Hmar pawhin thu sawiin, "Sorkar hmalaknaa SSA-TATA Trusts Grassroot Football Development Project hnuaia training centre-te hi MFA hmathlir a ni," a ti a; training centre hrang hranga hmeichhiate chu Mizoram hmeichhe football-a an innghahna tur an nih thu a sawi bawk.

Ambassador atana Jeje Lalpekhlua ruatnaah hian Jeje bakah SSA state project director Lalhmachhuana leh MFA Honarary Secretary-te'n hming an ziak a ni.