Infrastructure & Monitoring System Atlas

Mizoram Remote Sensing Application Centre (MIRSAC)-in Mizoram Infrastructure & Monitoring System (MIIMS) Atlas an buatsaih chu, nimin khan Secretariat Conference Hall-ah Planning minister Lalsawta'n a tlangzarh.

Lalsawta chuan, vansang lam thiamna hmanga hmasawnna ruhrel siamna atana ṭangkai tur map leh system buatsaih a ni chu lawmawm a tih thu sawiin, "Atlas-ah hian Mizoram khaw tina hmasawnna ruhrel neih dante tarlan a ni a, sorkar department-te'n mahni ṭhuthmunah awlsam takin hmun hrang hranga an department hmasawnna ruhrel an neih te, a ṭha lo laite chiang takin an hre thei dawn a ni," a ti.

Planning Minister chuan, New Economic Development Policy (NEDP) kalpuina atan pawh Atlas chu a ṭangkai dawn a; sorkar chu engkimah inrawlh vek loin, mimal leh pawlin an lei phak lo chin thil dang - khawl lian, inkalpawhna, kawlphetha, tui, hriselna lama inenkawlna leh thil dangte mipui mamawh angin a ngaihtuah dawn tih a sawi.

MIIMS Atlas tlangzarhna inkhawm kaihruaitu Dr C Vanlal-ramsanga, Planning secretary chuan, MIRSAC hnathawh chu sorkar department-te'n hmasawnna tur an ruahman hunah ṭangkai takin hmang ngei se a duh thu a sawi.

MIRSAC member secretary leh chief scientific officer Dr RK Lallianthanga chuan, MIRSAC-in MIIMS project a kalpui dan a sawifiah a; MIRSAC scientist C Vanlalengkima'n MIIMS hman ṭangkai dan tur a entir bawk.

MIIMS siam hna hi NEC aṭanga sum hmuh hmangin kum 2013-ah ṭan a ni a; Mizoram khaw tinin hmasawnna ruhrel an neih dan tarlan a nih bakah, an awmna hmun dik takah map buatsaih a ni. MIIMS project-ah hian Infrastucture mai bakah, chipchiar zawkin a kaihhnawih thil dangte pawh dah luh belh theih zel tum a ni.