KHAWTHLIR

Hepatitis enfiah

Mizoram State Network of Positive People (MISNOPP) leh CodNerc ṭangkawp chuan, July 28-a World Hepatitis Day lo thleng tur pualin Inrinni khan Thenzawl Bazar Venga Health Sub-Centre leh CodNerc pisaah a thlawna inentirna an buatsaih a, mithiamte'n inentirte chu Hepatitis-C an vei leh vei loh an enfiah. Free clinic-ah hian nu nau pai lai leh nausen pawmte ngaih pawimawh bik an ni a, mi 130-te thisen an endiknaah mi pathumin Hepatitis-C an vei tih hmuhchhuah a ni a, hmunpui lamah inenkawl tura tih an ni.

Hmalakpui turin MP ngen

YMA sub-headquarters, Serchhip hnuaia Vigilance & Monitoring Committee chuan, Thenzawl-Zote kawng laih muang lutukah hmalakpui turin Lok Sabha MP CL Ruala an ngen a; nimin khan Serchhip DC kaltlangin CL Ruala hnenah an thawn a ni.

Aizawla I-Day rêl

Aizawl DC Kannan Gopinathan hoin nimin khan a pisaah Aizawla Indpendence Day lawm dan tur rèl a ni. Ruahmanna an siam dan chuan, Lammualah lawm a ni dawn a, zing dar 9-ah chief minister Lal Thanhawla'n hnam puanzar a pawt pharh ang. Committee chuan, sakhaw hrang hrangte I-Day puala ram himna leh inlungrualna atana
ṭawngṭai tura ngen an rél bawk. I Day chawhnuah hian MFA buatsaih mipaleh hmeichhe football tournament final khelh a ni ang.

JJB thubuai

Social Welfare dept. hnuaia State Child Protection Society chhinchhiah danin, April 2012 aṭanga April 2016 thlengin Juvenile Justice Board (JJB) hnuaiah naupang, kumtlinglo pawi khawih thubuai 1,395 ziah luh a ni tawh a, an zinga 1,309 chu mipa niin 86 chu hmeichhia an ni. Thubuai ziah luh zingah hian rukruk thubuai a tam ber a, 589 ziah luh a ni.