Aadhaar-ah chhànna la awm lo Aadhaar siam thar thei rih lo

Gas subsidy atana Aadhaar card thehluh ngei phût a nih tâk avangin Mizoram sorkar chuan ngaihhnathiam turin sorkar laipuiah ngenna a thawn a, chhanna an la dawng lo. Hetih lai hian, Mizoramah Aadhaar card siam thar theih a ni rih lo.

Food Civil Supply & Consumer Affairs (FCSCA) department hotute chuan, July 2016 aṭanga Aadhaar card theh-lutte hnenah chauh gas subsidy pek an ni ta leh, September 30, 2016 hmaa Aadhaar card thehlut lote hnena gas subsidy pek an nih tawh dawn loh avangin July 12, 2016 khan Ministry of Petroleum & Natural Gas hnenah ngaihhnathiam tura ngenna an thawn. Ngaihhnathiamna hi hun biktuk awm loin, a theih anga rei turin ngen a ni.

Tun dinhmunah chuan Aadhaar card siam thar theih a ni rih lo a, engtikah nge buaipui theih a ni ang hriat theih a la ni lo.

Aizawl DC pisa aṭanga thu dawnna chuan, Mizorama Aadhaar buaipuitu ECIL leh an rawihte - Lyra Consultancy Service leh Integrated System Service-te inkarah inhmuh thiam lohna a awm avangin Aadhaar hi siam thei a nih rih lo.

Hetih lai hian, kum 2014 china Aadhaar card siamtir tawh, la chhuak lote tan Aizawl DC office-ah ngaihven theih a ni.