Inthlan lohna V/C-te Term pawhsei tum a ni HPC(D) biak tumna kan nei lo: HM Zira

Home minister R Lalzirliana chuan, HPC(D) vauna vanga April 30, 2015-a village council inthlan tura nomination file awm lohna khuaa V/C ding laite chu an term pawhsei a nih dawn thu a sawi. Hetih lai hian, tun dinhmunah sorkarin HPC(D) nena inbiak tumna a nei lo.

Thuthar thehdarhtute zawhna chhangin Home Minister chuan, "Aizawl district chhung khaw 24 leh Kolasib district khaw parukah V/C inthlan neih thei a ni dawn lo. Tuna V/C member ni laite chu an term pawhseisak a, interim-a an nihna lo chelh chhunzawm tura tih an ni dawn a, tunah chuan an term a la tawp chiah lo," a ti.

R Lalzirliana chuan, tun dinhmunah HPC(D) nen inbiak tumna a awm lo tih sawiin, "HPC(D) hotute'n inbiak an duh thu an sawi a, chumi hnu kar hnih vel hnuah remna lam hawi loin, râwng taka an chêt zui avangin rin ngam chi-ah kan ngai tawh lo," a ti. HPC(D)-te chu inbiakna neihpui aiin an phû tâwk hremna pek sorkarin a ngaihtuah zawk thu a sawi.

Home Minister chuan, HPC(D)-te bei let turin operation neih mek a nih thu a sawi a; HPC(D)-te chêttlatna vel khaw hrang hrangte chu theihtawpa sorkar thlawp turin a sáwm.

HPC(D)-te dan páwna hnâwl an nih theihna atana hmalak mek a ni tih sawiin, R Lalzirliana chuan, "HPC(D)-te laka sorkar hmalaknaah eptu party-te'n min thlawp ṭha hle a, a lawmawm ka tiin eptu party-te hi ka fak tak zet a ni. Ram changkang kan tihah pawh political party-te inhnial deuh ṭhin mah se, ram leh hnam thilah chuan an ṭangho ṭhap ṭhin," a ti.

Home Minister sawi danin, tunah hian Mizoram police-te'n HPC (D) te zawng turin operation ngawrh takin an nei mek a ni.