KHAWTHLIR
BCM free clinic
BCM Shalom Kohhran, Mission Vengthlang chuan, Inrinni khan Champhai district-a Ngûr khuaah a thlawna inentirna an buatsaih. He free clinic-ah hian mi 200 chuang an inentir a, a thlawnin damdawi an pe nghal a; Champhai DC H Lalengmawia'n a hmanpui a ni.
BSNL nuar dawn
India ram pumah Bharat Sanchar Nigam Ltd. (BSNL)-a thawkte inzawmkhawm na, Forum of BSNL chuan April 21-22, 2015 hian an thil phût tihhlawhtlin ngiatin an nuar dawn. Mizoramah pawh zawm a nih dawn avangin BSNL office leh a kaihhnawih pisate dawr theih an ni dawn lo a, mipui hriatthiamna an ngen a ni.
Lungleiah bandh
Lungleia Mizo Students Union leh an thawhpui pawl dang ṭhenkhatte chuan sikul kai hun sawn hma duh loh lantir nan vawiin aṭang hian Lungleiah tiam chin awm loin bandh huaihawt an tum nia thu dawn a ni. MSU-te chuan Lunglei district-a Lungsen khuaah bandh huaihawt an tum bawk.
Pawngsualtu man
Zemabawk tlangval palite chu, hmeichhia kum 17 mi pawngsuala puhin April 17, 2015 zan khan police-in an man. Police aṭanga thu dawn danin, mipa palite leh hmeichhia hi kohhran ṭhalai hnatlangah an kalho a, mipate chuan hrâi rûiin an pawngsual ta a ni.
Jubilee lawm
Lawngtlai district-a Mamte ṬKP unit chuan April 17, 2015 khan diamond jubilee an lawm a, mei an dêt bakah jubilee lungphun an hawng. Jubilee lawm nan hian Lawngtlai District Hospital-ah thisen unit 20 an pe a ni.
AICS Valedictory
Academy of Integrated Christian Studies (AICS) chuan nimin khan Thanzinga Chapel, AICS Campus, Tanhrilah an college aṭanga zir chhuakte thlahna inkhawm, Valedictory Service an hmang a, BCM general secretary Rev. H Lianngaia'n thlahna thuchah a sawi. Kuminah hian AICS aṭangin BD zo 23, MDiv zo mi panga leh Diploma in Mission zo mi 10 an awm a ni.