2014-15 ah thisen unit 23,093 an pe 2014-15 ah voluntary donation a tlahniam
Sorkar kum liam ta, 2014-15 chhung khan Mizoram pumah thisen unit 23,093 pek a ni. Heng zinga unit 17,663 hi a thlawna pek (voluntary donation) niin, 76.49% a ni. Voluntary Donation hi kum 2913-14 aiin a tlahniam.
Mizoram State AIDS Control Society record aṭanga a lan danin, April 2014 - March 2015 chhunga thisen pek zat unit 23,093 hi kum 2013-14 chhunga pek zat 22,226 aiin 867-in a tam zawk a; voluntary donation erawh chu kum 2013-14 ah unit 20,699 (93.13%) a nih laiin, 2014-15 ah chuan unit 17,663 (76.49%) chiah a ni.
Kum 2013-14 ah blood donation camp ṭum 436 neih a nih laiin, 2014-15 ah chuan camp 357 neih a ni a; donation camp-a thisen pek zat pawh 2013-14 ah unit 17,429 a nih laiin, 2014-15 ah chuan 13,128 a ni.
Kum 2014-15 ah hian Aizawl Civil Hospital, Champhai Hospital, Christian Hospital Serkawn leh Saiha Hospital-ahte kum 2013-14 aiin thisen pek zat a tam a, blood bank dang parukah erawh chuan a tlahniam thung. Voluntary donation chu blood bank tinah a tlahniam vek.
Association for Voluntary Blood Donation (AVBD) hruaitute chuan, voluntary donation a tlakhniam chhan nia an ngaih chu sawiin, "Blood bag neih loh vangin donation camp an nei tam thei lo a, donation camp neih zat leh camp-a thisen pek zat pawh a tlahniam hle a ni," an ti a; thisen sawngbawlna lak vang niin an ngai lo.
AVBD hruaitute sawi danin, January 1, 2015 aṭanga thisen dawngtute aṭanga sorkarin thisen sawngbawlna man lak tura a tihin nghawng nei tho mah se, a thlawna thisen pek a tlakhniam phah lutuk lo. Kum 2014-15 chhung khan blood bag neih loh vangin hun rei tak chhung district-a blood bank-te'n donation camp an nei thei lo