Health Care-ah Rs. 8,76,67,907 pe HCS & RSBY enrolment tihthar mek a ni

Kum 2014-15 chhung khan Health Care Scheme (HCS) hnuaiah mi 7,604 hnen aṭangin bill Rs. 13,85,10,502 dawn a ni a; bill-te chu enfiah hnuah mi 5,552 hnenah Rs. 8,76,67,907 pek a ni.

Hetih lai hian, Below Poverty Line (BPL) chhungkuaa mite damdawia an inenkawlna senso tumsakna, Rashtriya Shuraksha Bhima Yojana (RSBY) chu tihtawp lailâwk rih a ni.

Mizoram State Health Care Society (MSHCS) hotute chuan, RSBY chu tihtawp lailâwk rih a nih thu sawiin, Central aṭanga pawmpuina hmuh a nih leh veleh smart card ngai hmangin damdawi-inah inenkawl leh theih a ni dawn tih an sawi.

MSHCS hotute'n Vanglaini an hrilh danin, RSBY-a inziak lut mekte tan April-June 2015 chhungin enrolment tihnun thar (renew) vek tur a ni a, RSBY-a la inziak lut lote a thara inziah luh erawh a theih rih loh a ni.

HCS chu September 2015 thleng pawhsei a ni a; HCS-a inziak lut­te tan enrolment renew theihna hun April-June chhung a ni a, la inziak lut lo, inziak lut thar duh tan pawh inziah luh theih bawk. Mahni bial­tu Health sub-centre-ah inziah luh tur a ni.

MSHCS hotute chuan, HCS-a bill pek ṭhinah mi ṭhenkhatin HCS-a an inziah luhna ṭheuha a sang ber zel lak an tum ṭhin tih sawiin, scheme kalphung an hriat chian loh vang a nih thu an sawi a, "Bill kan dawnte chu kan endik hnuah sorkar rate ang zel­in kan pe chhuak ṭhin a, sorkar rate aia sanga pek theih a ni lo," an ti.

Thu dawnnain a sawi danin, HCS-a inziak lutte'n damdawia inenkawlna senso zawng zawng bill an tum ṭhin vangin bill a tam angin a lan phah ṭhin.

Kum 2014-15 chhunga mi 7,604 hnen aṭanga bill an dawn belhkhawm chu Rs. 13,85,10,502 a ni a; bill-te chu sorkar rate anga an enfiah hnuah mi 5,552 hnenah bill an pe tawh a, pek tawh zat chu Rs. 8,76,67,907 a ni.

Bill dawn tawh enfiah mek mi 1,828 awmin, chung mite'n pawisa an dil zat chu Rs. 3,04,27,614 a ni. Bill an dawn zinga 224 chu an hnâwl thung.

Kum 2014-15 chhung vekin RSBY-ah mi 24,892-in dilna an thehlut a, sum an dil (claim) zat belh khawm chu Rs. 13,70,76,407 a ni. Mi 17,119 hnenah Rs. 9,12,49,505 an pe tawh a, mi 1,513 dilna erawh hnawl a ni. Bill endik mek mi 6,260 awmin, an sum dil zat chu Rs. 3,40,96,032 a ni.

Bill an hnâwl chhan sawiin MSHCS hotute chuan, "An bill theih chin (critical list)-a inziak piah lama mi an rawn bill tel vang te, Hepatitis-C bikah kar 24 chhung enkawl ngai leh kar 48 chhung enkawl ngai an awm a, enkawl hun chhung aia tam an bill vang te, zu leh damdawi hmansual kaihhnawih vanga natna bill tumte tan a bill theih loh vangte a ni," an ti.