Mamit dist-ah sensitive polling station paruk

V/C inthlan tura Mamit district-a observer Zothankhuma, IAS hoin Inrinni khan Mamit district election officer Vanlalngaihsaka, Mamit DC ni bawk pisaah District Level Standing Committee an ṭhukhawm a; Mamit district-ah ven uluk ngai zual khua (polling station) paruk a awm thu an sawi.

Election observer Zothankhuma chuan, inthlanna felfai leh muanawm tak a awm theih nan ṭanrual a pawimawh thu sawiin, thawhhona ṭha an neih a beisei thu a sawi a; vote tlate chu khaw thim hnua chhiar a ngaih dawn avangin chatlak loa êng a awm theih nan P&E department lamin mawhphurhna sang tak an neih thu leh, inkalpawhna kawng lamah pawh PWD-ten ṭan an lak a ngaih thu a sawi.

Zothankhuma chuan, ziak chhiar thiam lo leh rualbanlo, mahnia vote thlak thei lote pui turin polling duty-te hman a rem loh thu a sawi a, ballot paper-te chu polling booth páwnah ken chhuah a rem loh thu a sawi bawk.

DEO Vanlalngaihsaka chuan, Mamit district chhunga V/C zat, seat awm zat leh voter awm zatte kalkhawmte a hriattir a; ballot paper pahnih, reserved seat atan a sen no (pink) leh general atan a var (white) hman a nih tur thu a sawi.

Mamit SP C Lalnun­mawia’n a venhimna kawnga an hmalak dan sawiin, venhimna buaipui turin mi 227 dah an nih tur thu leh a ṭul thuta koh belh tur mi eng emaw zat ruahman a nih thu a sawi.

Mamit SP sawi danin, Mamit district-ah sensitive polling station paruk a awm a; chung­te chu - Zomuan­tlang, Khantluang, Tuipuibari-I, Damparengpui, Mualṭhuam leh Kolalian te a ni. Heng polling station parukah hian MRP pakhat leh armed police panga ṭheuh dah a ni ang.