CCTV bun thawh khatna zo hnai

Aizawl khawpuia closed circuit television (CCTV) bun hna thawh khatna chu zawh thawkhat tawh a ni a, a taka hman thuai tum a ni.

Home department hotute hnen aṭang thu dawn danin, Aizawl khawpui chhung hmun pawi­mawh zuala CCTV bun­na tur hian Ministry of Home Affairs aṭangin Rs. 12,65,00,000 a ruahman a ni a; a thawh khatnaa CCTV bun nan Rs. 3,97,00,000 dah a ni.

CCTV bun thawh khatnaah hian Aizawl chhim lam hmun 11-ah CCTV vuah a ni a, chung­te chu - Khatla kâwn, Khatla Secretariat Complex kawng péngṭhuam, Aizawl Tennis Court bul, Raj Bhavan chhim lam gate bul, Treasury Square, MIZOFED petrol pump bul, Temple Square, Zodin Square, Canteen Square leh Bazar Bungkawnte a ni.

Thawh khatna zawh fel hnuah hmun 33 dang - Aizawl Police Sta­tion, Bawngkawn Police Station leh Vaiva­kawn Police Station huam chhung­a hmun pawi­mawh laiahte bun leh a ni ang.

CCTV bun hna thawk tur hian KSJ Dynamic Security Pvt. Ltd., New Delhi rawih an ni a, January 14, 2014 khan sorkar nen CCTV vuah turin inremna thuthlung an siam a ni.

CCTV bunah hian Aizawl SP office-ah control room siam a ni a; Aizawl PS, Bawngkawn PS, Vaivakawn PS leh Kulikawn PS-ahte sub-control room dah a ni ang.