SEC-in Khawhnai RO hrem turin a hriattir

Mamit district-a Khawhnai V/C thlanna tura returning officer T Zalianmawia, Khawhnai Primary School head-teacher chu nomination file theih hun chhungah thil a tihsual avangin a phû tâwk hremna pe turin State Election Commission-in School Education directorate a hrilh.

SEC aṭanga thu dawn danin, Khawhnai V/C thlan tura RO T Zalianmawia hian chuh tura hming pek luh theih ni hnuhnung chu April 16, 2015 a ni tiin hrittirna a chhuah a; mahse, hming pek luh theihna ni hnuhnung chu April 13 a ni. Hei vang hian candidate turte'n hming an pek luh theih loh phah niin an sawi.

RO T Zalianmawia thil tih dan chu a dik lo tih SEC-in an finfiah hnuah Khawhnai Middle School zirtirtu Sairopuia chu RO turin a ruat a; Khawhnaiah hian inthlana hming pek luh theih hun pawh pawtseiin, vawiin chhun dar 12 thleng hun hawn a ni. Nomination endik hun tur leh inhnuhdawh hun hnuhnung pawh vawiin chawhnu dar 1 a ni ang.