Kum 2013-15 chhungin in 281 a kâng
Kum 2013 aṭanga March 31, 2015 thleng khan Mizoramah chenna in 281 a kâng a, mi 12-in nunna chánin, mi 20 an hliam a; bungraw kâng chhia hlut zawng chu cheng vbc. 10 vel hû a ni.
Fire and Emergency Services department chhinchhiah danin, kumin bikah January-March thla chhung khan Mizoram pumah chenna in 33 a kâng a, kâng chhia hlut zawng chu cheng nuai 100 chuanga ngaih a ni. Kuminah in kâng vangin mi pakhat a thi tawh bawk.
Kum 2014 chhung khan Mizoram pumah chenna in 87 kângin, mi pariat an kâng hlum a; bungraw kâng ral hlut zawng chu cheng vbc. 4.22 vela chhût a ni. Kum 2013 chhung khan chenna in 161 kângin mi pathum an kâng hlum a; bungrua cheng vbc. 4.16 vel hu a kâng rala chhût a ni.
January 2013 aṭanga March 2015 inkara in kângah hian a kan chhanah electric current kal dik lo vanga puh a tam ber a; electrict shortage vanga kâng nia rinhlelh hi kum 2013-ah 32, kum 2014-ah 37 leh kumina thla thum chhungin pasarih a awm a ni.
Fire and Emergency Services department hotute chuan, kângmei chhuak tam ber chu fimkhur tâwk loh vanga thleng a ni tih an sawi a; in chhuahsan hmaa kângmei tichhuak thei thil enfel hmasak te, eirawngbawlna gas fimkhur taka hman te, in chhung electric wiring endik fo te, electric hmanrua fimkhur taka hman te, mei nung lai ngaihthah lohte chu kangmei laka himna tura thil pawimawh langsar zual a nih thu an sawi bawk.