Kum 10 aia upa tawh lirtheite Sumdawnna'n hman phal dawn lo

Mizoram State Transport Authority (STA) chu nimin khan an chairman, Transport secretary Dr Franklin Laltin-khuma hoin a pisaah an ṭhukhawm a; Aizawla two wheeler taxi kalpui dan turah ruahmanna an siam bakah, sum-dawnna lirthei (public transport vehicle) atan kum 10 aia upa tlantir loh an rêl.

STA meeting chuan, public service vehicle thlak (replacement) chungchangah mipuite him zawkna a nih beiseiin auto-rickshaw, two wheeler taxi, maxicab, bus, etc. atan kum 10 aia upa hman tawh loh ni se, an ti. Lirthei kum 10 aia upa neitute chu an motor thlak (replace) phalsak an ni ang.

Light public vehicle (LPV) hnuai lam neitute chu an lirthei thlakna atan thla ruk chhung hun pek an ni dawn a, medium public vehicle (MPV) leh heavy public vehicle (HPV)-te chu thla riat chhung hun pek an ni thung ang. Hun pek chhunga motor an thlak loh chuan permit tihtawpsak tur an ni ang.

Motor thlak a nih hnuah kum nga atan permit pek a ni ang a, kum nga a ral hnuah motor-in fitness test a paltlang chuan, kum nga dang pawhseisak leh theih an ni ang. Chumi hnuah chuan an permit a tawp (expire) dawn a; replacement hi vawi khat chiah tih theih tura ruahman a ni.

Meeting chuan, mipui vantlangin an
ṭangkaipui zawk beiseiin Aizawl khawpui chhunga two wheeler taxi service turin permit pek chhuah an rem ti.

Ruahmanna ang chuan, two wheeler taxi atan hian motor register tawh pawh, kum 2 aia upa lo a nih chuan phal a ni ang a, engine len zawng chu 125CC leh a chung lam hman tur a ni ang.

Two wheeler taxi khalhtu chuan helmet rawng eng (yellow) a khum ang a, a hma lama ‘TAXI’ tih rawng sena ziah tur a ni a; public service vehicle a nih dawn avangin registration number plate pawh a engah a duma ziah tur a ni.

Aizawl khaw dáia auto-rickshaw tlantir chungchang pawh meeting-ah hian sawiho a ni. An service dan tur chu, Aizawl chhim lamah ACBOA office bul, Ngaizel thleng, Aizawl khawchhak lamah Ṭhuampui thleng, Aizawl khawthlang lamah Luangmual, Chhangurkawn thleng, Aizawl hmar lamah Durtlang Leitan thleng tlan luh phal a ni ang a; Aizawl khawpui chhung lamah luh phal a ni lo.

Taxi-te tana All Mizoram Permit tihtawp chu sût a ni a, Mizoramin tourist taxi a mamawh tawk a neih hnuah All Mizoram Permit chungchang chu ngaihtuah nawn leh tura dah a ni.