Mizoram quota zat hriat a la ni lo

Mizoramin Bachelor of Medicine and Bachelor of Surgery (MBBS) leh Bachelor of Dental Surgery (BDS) zirnaa quota a neih tur zat hriat a la ni lo. National Eligibility & Entrance Test (NEET)-II result chhuah hunah sorkar laipui chuan Mizoram quota tur a hriattir dawn a ni.

Higher & Technical Education (HTE) department chuan MBBS leh BDS-a Mizoram quota zat tur hriat la ni lo mah se, State Medical and Technical Entrance Examination (SMATEE) aṭanga Mizoram quota-a MBBS leh BDS zir tura inziak tlingte chu counselling an neihpui tawh a; counselling-ah hian Mizoramin nikuma quota a neih mila koh an ni.

Mizoram Chakma Students Union (MCSU)-te'n Gauhati High Court-ah Mizoram sorkarin State Technical Entrance Examination (STEE) Rules-a a siam danglam an khin avangin, High Court chuan Rule 5 chu hmang lo turin Mizoram sorkar a hriattir a; hei vang hian Mizoram state quota SMATEE 2016 kaltlanga seat pek chhuahna tura June 29, 2016-a counselling neih tur pawh tihdanglam a ni.

Hemi hnu hian HTE Minister leh MZP-te an inbiakrem hnuah counselling chu July 12, 2016 chawhma dar 10 aṭangin tih ṭan a ni.

Zawhna chhangin HTE department hotute chuan, Gauhati High Court thupek avangin Mizoram quota-a MBBS leh BDS zir tura thlan counselling pek tawhte'n harsatna an tawh an rin loh thu an sawi a, "NEET-II zawh a nih hnuah kan quota tur kan hre thei ang a, chumi hnu chuan an zirna turah admission an ti ve mai thei turah kan ngai," an ti.

NEET exam hi chhâwng hniha kalpui a ni a, NEET-I chu May 1, 2016-ah neih niin, NEET-II chu July 24 khan neih a ni thung.