ACB-in chargesheet pali a thehlut tawhah mihring hming 25 a lang

Anti Corruption Bureau (ACB) chuan kum 2016 chhunga thubuai an chhuinaa an thil hmuh dan (chargesheet) pali Court-ah an thehlut tawh a, chargesheet paliah hian mi 25 hming a lang.

ACB chargesheet-a mihring lan tamna berah mi 14 hming langin, pakhatah mi pali hming a lang a; a dang pahnihah chuan mi pakhat hming ve ve a lang.

Chargesheet pali zinga pakhat chu Court-ah ngaihtuah tura tih a ni tawh a, mahse, chhan hrang hrang vangin ngaihtuah a la ni lo. A bâk zawng chu tun hnaia thehluhna a ni.

Court-a ngaihtuah tura tih tawh hi Kau-Tlabung Mini Hydel Project leh Tuipanglui Mini Hydel Project thubuai a ni a, a ngaihtuahtu tur judge chawlh vang leh sorkar ukil inthlak vangin ṭum hnih ngaihtuah hun tur sawn a ni tawh.

ACB-te hian kumin chhung vekin thubuai pahnih an ziak lut tawh. Thubuai an ziah luhte chu - Ramhlun Sports Complex-a dan lo leh inbumna hmanga ram hralh leh inpek chungchang leh Raichhawkzau Watershed Project tihhmasawnna tur sum tihchingpen chungchangah a ni a, mi pasarih ve ve hming a lang.

Kumin hian ACB-te chuan thubuai chhui zui tlak a nih leh nih loh zir chian tur (preliminary inquiry) 10 an dawng tawh. ACB-te hian preliminary inquiry report hi Vigilance department-ah an thehlut ṭhin a, anni hian criminal case emaw, departmental inquiry tur emaw tihtawp turah thutlukna an siam ṭhin. Kumin hian Vigilance department chuan thubuai pariat chu criminal case-a kalpui turin thutlukna an siam tawh a ni.

Thu dawn danin, ACB-te hian criminal case-a kalpui tur emaw preliminary inquiry tur emaw an dawnte chu an dawn kumah an zo nghal kher lo a; kumina criminal case-a kalpui tura an dawnte pawh hi kumina preliminary inquiry an tiha mite an ni kher lo.

Hetih lai hian, ACB-te'n Aizawl District & Session Court-a charge-sheet an thehluh tawh zinga 36-ah thutlukna siam a la ni lo.