KHAWTHLIR

Thisen pe

Hrangbana College chuan, nimin khan an college golden hall-ah blood donation camp an huaihawt a, Aizawl Civil Hospital tan mipa 146 leh hmeichhia 27-te'n thisen unit 173 an pe.

Art workshop

Mizoram Art Development Society (MADS) buatsaih, ni li awh tur Annual Art Workshop chu nimin khan Aizawl Art Gallery-ah ṭan a ni a, IPR joint director Lalnithangi'n a hawng.

Mamita in sakna tur

Mamit additional DC H Lianzela hoin nimin khan DC conference hall-ah District Level Executive Committee on Deendayal Awas Yojana - National Urban Livelihood Mission an ṭhukhawm a; chenna in nei lote tana in sakna hmun atan Mamit District Hospital bul an ruahman.

Mi 12,013 admit

Aizawl Civil Hospital-ah June 2016 chhung khan mi 37,429 an inentir a, mi 12,013 admit an ni. Nau piang 313 awmin, mi 52 an thi a; damlo mi 212 chu Mizoram páwnah kal tura tih an ni.

Health camp

AH&Vety department leh North East Initiative Development Agency (NEIDA)-te hmalaknain, nimin khan Khawlailungah Awareness Campaign cum Animal Health Camp buatsaih a ni a, ran 160 entir niin, a thlawnin damdawi an pe nghal.

Siaha mock drill

Siaha District Disaster Management Authority leh 1st Bn. National Disaster Response Force (NDRF) ṭangkawp chuan July 19-25 chhung khan Siaha khawpuia hmun hrang hrangah chhiatrupna laka inven dan leh chhanchhuah hna thawh dan entirna 'mock drill' an buatsaih a; sikul hrang hranga neih hnuah July 25 khan DC Conference Hall-ah khar a ni.

Audit zo

Accoutant General office, Mizoramin Kolasib district chhunga performance audit an neih chu nimin khan zawh a ni a, a khaikhawmna hun DC conference hall-ah DC H Lalengmawia hoa neih a ni.