Sports Minister-in Judo hall a hawng

Mizoram Judo Association-te puala Zemabawka judo hall sak thar chu, nimin khan Sports & Youth Services minister Zodin-tluanga'n a hawng. Minister chuan, sorkarin infiammite tana hmun-hma a siam chu infiammite'n hmang ṭangkai se a duh thu a sawi.

Zodintluanga chuan, "Sorkar-in ṭhalaite hmasawnna turin nasa takin hma a la a, ṭhalaite tan infrastructure tam tak Chief Minister hmalakain a pe che u a, sorkar chona che u hi kan thinlungah kan ngam ve tawh tur a ni. Kan thinlungah Vairengte kan pelh a ngai a, Vairetengte pêl mai ni loin, India pêla khawvel hi rapbet ve tawh turin ṭhalaite kan cho che u a ni," a ti.

Sokarin khawpuiah infiamna hmun a siam hmasa a, thingtlang leh district headquarters-ahte hmalak leh mek a nih thu sawiin, Zodintluanga chuan, judo hall sak thar chu ṭangkai taka hmang turin infiammite a chah bakah, uluk taka enkawl turin khawtlang leh association-te a chah.

Sports Minister chuan, Lalrinfeli chu Olympic lo awm turah India hmeichhe hockey team-ah team-ah tel lo mah se, a tel tur thu a sawi a, "Inhliam palh an awm tâka inring turin hruai a ni dawn a, tunah USA-ah an awm mek a ni," a ti.

Sorkarin infiamna hmunhma eng emaw zat a siam mek tih sawiin, SYS Minister chuan, "International standard size swimming pool siam zawh a ni tawh a, diving pool pawh zawh thawkhat a ni tawh. Phulpui, Muallungthu leh Lengpuiah sports complex zawh thawkhat a ni tawh bawk," a ti.

Serchhipah hall pathum, Sazaikawnah Contact Sports Centre, Bungtlang leh Keiṭumah hall, Champhai, Lunglei leh Kolasib-ah sports stadium puitling sak mek leh zawh thawkhat tawh a awm thu leh, Saitual leh Hnahthialah artificial turf phah tum a nih thu a sawi bawk.

Judo hall sak nan hian kum 2013-14 khan Mizoram sorkarin SPA aṭangin Rs. 1,50,00,000 a pe a, School Education department phalnain Zemabawk P/S-I ramah sak a ni.