Chief Minister-in Cherry Blossom Avenue lungphûm a phûm

Planning department hnuaia Directorate of Science & Technology, Institute of Bioresources & Sustainable Development (IBSD) Imphal leh Environment, Forests & Climate Change department ṭangkawpte'n Mizorama Cherry Blossom Avenue hmasa ber tur Secretariat complex (AG office bul)-a an din tur lungphùm chu nimin khan chief minister Lal Thanhawla'n a phúm a; cherry blossom ṭiak a phun nghal.

Chief Minister chuan, ramngaw leh ramhmul lama Mizoram hausaknate theihtawpa hai chhuaha hman ṭangkai mek a nih thu sawiin, "Cherry Blossom Avenue hi kan hausaknate hman ṭangkaina kawngah leh a bik takin eco-tourism lama hmasawnna kawngah Mizoramin ke a pênna rahbi pawimawh tak a nih ngei ka beisei a ni," a ti.

Tuna thing phun ang programme chu Mizoramin kum 1998-ah a kalpui tawh tih sawiin Lal Thanhawla chuan, "Green Mizoram hnuaiah thing ṭiak nuai tam tak phun a ni tawh a, a tum ber chu mipuite rilrua thing leh ramngaw pawimawhna leh humhalhna tuh a, Mizorama thing leh mau humhalh a phun belh a, Mizoram ramngaw siamṭhat a ni," a ti a; Cherry Blossom Avenue chu Green Mizoram thil tum nen inhmeh a tih thu a sawi.

CM Hawla chuan, Mizoramin ramngaw leh thingin a khuh ram 'forest cover' nei ṭha mah se, ngawpui leh ngaw dur (dense forest) chu 0.65% chauh a nih thu a sawi a, "Kan ramngawte hi a ngaw belh zel nan quality planting material leh village forest lamah
ṭan lak a pawimawh," a ti.

Institute of Bioresources & Sustainable Development director Prof. Dinabandhu Sahoo pawhin programme buatsaih chhan sawiin, "Hetiang ang hun hi Meghalaya leh Manipur-ahte tun hnaiah buatsaih a ni. Mizoramin sik leh sa dinhmun ṭha tak, thlai leh thingte ṭhat duhna em em a neihte hriain, hmasawnna atana hman ṭangkai a nih theih nan buatsaih a ni," a ti a; Mizoram hmun dangah pawh eco-tourism lama mite hîpna atan chhunzawm theih a nih a beisei thu a sawi.