Adopted village atan Tachhip thlang

T Romana College-in academic research atana an khaw thlan, Ta-chhip khuaah nimin khan 'adopted village' hawnna hun an buatsaih a, bialtu MLA, parliamentary secretary KS Thanga'n a hmanpui.

KS Thanga chuan sorkar laipui hmalakna - Unnat Bharat Abhiyan Scheme hnuaia, sorkar zirna-inte'n adopted village nei a, hmasawnna hna eng emaw tal kalpui tura tih an nih anga T Romana College-in Tachhip khua an thlang chu lawmawm a tih thu a sawi a, "Tachhip khua hi hmasawnna leh changkanna lamah nasa taka a puih theih ngei ka beisei," a ti.

Unnat Bharat Abhiyan hi Ministry of Human Resource Development (MHRD) duan a ni a, scheme hnuaiah hian thingtlang khuate tihhmasawn nan zirna-in sang zawk Indian Institutes of Technology (IIT), National Institutes of Technology (NIT), Indian Institutes of Science Education & Research (IISER) leh university hrang hrangte'n khawtlang mamawh leh harasatnate zir chiangin, tunlai thiamna hman
ṭangkai dante an ngaih-tuahsak dawn a ni.