Zoram Nationalist Party-in Kawlphetha siam kawnga hlawhchhamah sorkar puh

ZNP chuan thuchhuah siamin, kum 40 chuang Mizorama sorkar hrang hrang ding tawhte chu kawlphetha siam chhuah kawngah an hlawhchham niin an tarlang.

ZNP chuan, Mizoramin sorkar a neih kum 40 chuang a nih tawh hnuah party pathumin sorkarna an chelhb tawh tih sawiin, "Tunah hian mini hydel project pang-a emaw chauh chhawr tlak kan nei a, ṭhál laiin megawatt 9 leh fûr laiin megawatt 11 vel chauh pe chhuak ve anga ngaih a ni. Kawlphetha siam chhuah kawngah sorkar kal tawh leh kan hrawn mek hi an hlawhchham hulhualah kan ngai," an ti.

Mizorama lui hrang hrang aṭangin kawlphetha megawatt 4,500 pe chhuak thei a awm laiin, 0.66% chauh kawlphetha siam nan hman a nih thu sawiin, ZNP chuan, "Mini hydel project pariat chu rei lo tê hnuah hluihlâwn zui a ni a, a ṭhen phei chu a hawn kumah hluihlâwn nghal a ni," an ti a; kawlphetha megawatt 4,500 vel siam chhuah theih a nih laia megawatt 9 vel chauh siam chhuah a ni chu lungchhiatthlak an tih thu an sawi.

ZNP chuan, Mizorama lui zawng zawng khuah a ṭha ber em, sik leh sá leh thil dangah tawrhna a thlen thei em tihte thlir chunga fimkhur taka power policy ennawn ṭul an tih thu an sawi a, "Ruling party leh a hruaitute thlak ringawt hian kan ram a tidam zo lo. Kalphung thar a ngai tih hi a lang chiang hle," an ti.