Ukil chak leh chak loh sorkarin a chhinchhiah lo

Mizoram sorkarin Gauhati High Court, Aizawl Bench atana ukil a rawih, advocate general Biswajit Deb chuan kum nga chhungin thubuai 53 a dinpui a; High Court-a thubuai a dinpui tawhte a chakpui dan leh a chakpui loh dante Law & Judicial department-in a chhinchhiah mumal lo.

RTI Act hmangin Law & Judicial department-ah Mizoram sorkarin a rawih advocate general Biswajit Deb-a'n kum nga, January 2011 leh May 2016 inkara High Court-a thubuai a dinpui danah zawhna panga zawh a ni a; zawhnate chu kum nga chhunga thubuai dinpuite leh a dinpui zat te, thubuaia sorkar chakpui zatte leh kum nga chhunga thubuai khawih zinga la chinfel lohte a ni.

Law & Judicial SPIO chuan, AG-in thubuai a dinpui chungchanga zawhnate chu an chhin-chhiah fel loh avangin an chháng chiang thei lo a, thubuai a dinpuite erawh chhanaah tarlan a ni thung.

Mizoram sorkarin Gauhati High Court-a advocate general Biswajit Deb a rawihna atan hian kum 2011-2016 chhungin Rs. 36,99,340 a seng tawh a, February 2, 2009-a rawih ṭan a ni. AG hi High Court-ah hian vawi 189 chuang a ding tawha chhinchhiah a ni bawk.