Aug. 1-ah AYUSH Hospital-ah inentir tan dawn

Thenzawla Integrated AYUSH Hospital chu nimin khan Health principal director Dr K Ropari'n a tlawh a, building sak zawh tawha room hrang hrangte leh mamawh la awmte enfiahin, thawktu dah tawhte chu August 1, 2016 aṭanga inentirna (OPD) hawng turin a hriattir.

Dr K Ropari ho hian AYUSH Hospital-ah hian staff meeting neih a ni a; K Ropari chuan, AYUSH Hospital-a damlo admit ngai an awm chuan admit theih a nih tawh thu an sawi a, "Ayush Hospital-a inentir damlote tan a theih chin chinah damdawi a thlawna pek a ni ang," a ti.

Dr K Ropari chuan, AYUSH Hospital-a thawkte chu anmahni ta tak tak a ni tih hriaa hna thawk tur leh, damlo an nei emaw nei lo emaw, an hna thawhna (station) chu ṭul bik thilah lo chuan chhuahsan lo turin an chah a; thawktute inkaihhruaina hrang hrang a hrilfiah bawk.

Health Principal Director chuan, Mizoram chu India hmarchhak state-a Integrated AYUSH Hospital nei awmchhun a nih thu sawiin, "AYUSH hi India ramah a lâr zel a, thawktute pawhin mipui tan theihtawp an chhuah a ngai," a ti a; damdawi-in hawn a nih hunah sorkar laipui aṭanga sum hmuh hmangin staff quarters sak leh tur a nih thu a sawi.

AYUSH Hospital-ah hian thawktu residential medical officer pakhat hoin doctor pasarih dah tawh a ni a, chungte chu Ayurvedic doctor pathum leh Homoeopathic doctor pali an ni. Staff nurse 12 leh thawktu dang 30 an awm bawk.