Aizawl khawpui chhunga traffic Felfai taka enkawl dan tur sawiho

Traffic Management Committee chu nimin khan Home minister R Lalzirliana hoin Chief Secretary conference hall-ah an ṭhukhawm a, Aizawl khawpui chhunga traffic felfai taka enkawl dan tur sawihoin, khawpui chhunga kawngpui humhalh tura mawhphurtu bik 'Protection Squad' din an rawt.

Home Minister chuan, khawpui a felfai zawk theih nan member-te ṭhahnemngaihnaah lawmthu a sawi a, "Committee member-te hi dan siamtu leh kengkawhtute mai bakah, mipui zawng zawng chunga mawhphurtu kan ni," a ti.

Meeting-ah hian, vendor-te inphona tur hmun rem leh mumal zawk te, kea kalna, multi-storey motor parking siam leh thil dangte sawiho a ni.

Line bus permit leh licence nei turin Traffic SP aṭanga no objection certificate lak hmasak loh chuan pek an nih theih loh thu leh, line bus tur chu model/size tuk bik a nih thute tarlan a ni.

AMC (Control of Parking and Collection of Parking Fees) Regulation 2012 chungchang leh a kaihnawih dan leh hrai hrang hrang sawiho a ni a; Aizawl khawpui chhunga kawngpui humhalh tura mawhphurtu bik 'Protection Squad' din an rawt a ni.

Lirthei lei leh hralh (ownership transfer) chungchangah, mipui tan fimkhur a pawimawh avangin MVI lamin inhrilh-hriatna lamah
ṭan la se, an ti a; kawng sîra dan loa lirthei hûng
ṭhinte leh lirthei lei turte'n a dahna (garage) an nei ngei ngei tur tih chu khauh zawka kalpui tura hmalak an rêl bawk.

Meeting-ah hian traffic dan bawhchhiate pawisa chawi zat compounding fee rate bithliah zat chu ennawn a, dik taka lak a ni em tihte ngaihtuah a ni a; Lungverh aṭanga Ramrikawn panna kawng (via Sakawrtuichhun) kawng rintlak zawka siam a nih theih dan leh traffic control equipment mamawh - Sound Level Meter leh Speed Radar Gun neih theih dan kawng an ngaihtuah bawk a ni.