Siaha leh Lawngtlaiah MzSRLM hawng

Thawhlehni leh Nilaini khan Siaha leh Lawngtlaiah Mizoram State Livelihoods Mission( MzSLRM) hawn a ni a, Rural Development secretary Lalhmingthanga'n a hman pui.

Siaha-ah chuan nimin khan MzSLRM hi MADC forest hall-ah hawn a ni a, khuallian RD Secretary chuan sorkar laipuiin thing-tlanga BPL chhungkuate Self Help Group kaltlanga anmahni an inkhaichhuah theihna tur leh eizawnna ngelnghet an neih theihna atan kum 10 chhung zet SGSY scheme a kalpui tawh tih a sawi.

Lalhmingthanga chuan SGSY scheme hi duhthusama a hlawhtlin ngei theihna atan mission hnuaiah uluk taka enkawla vil zui turin kum 2010 aṭangin ruahmanna thar National Rural Livelihoods Mission (NRLM) a siam thu sawiin, "NRLM-in a tum ber chu thingtlang mirethei chhungkuaa hmeichhia, a theih chuan u berte SHG-a intelkhawmtir leh, an theihna hmang ngeia anmahni indawm-kantir a ni," a ti a, NRLM hnuaiah hian MzSRLM hi din a nih thu a sawi.

Inkhawmahah hian district function specialist H Lalṭanpuia chuan MzSRLM nihphung, thiltum leh hmachhawp hrang hrangte a lem nen a sawifiah.

MzSRLM hi Lawngtlaiah chuan Thawh-leh-ni khan DC conference hall-ah hawn a ni a, LADC hotute, department hrang hrang hotute leh Lawngtlai leh Sangau Block chhunga V/C leh tlawmngaipawl aiawhte an tel a. Khuallian RD secretary Lalhmingthanga, LADC EM Laltlawmlova Chinzah leh Lawngtlai DC Dr. A Muthamma ten thu an sawi.