Aizawla parking fee khawn tur thlan dan dik loa inrawlh turin PRISM-in UD&PA Minister ngen

PRISM chuan nimin khan UDPA minister Zodintluanga hnenah lehkha thehlutin, Aizawl Municipal Corporation (AMC)-in Aizawl khawpuia motor parking fee khawn tur a thlan danah thil dik lo tam tak a awma an hriat thu an hrilh a; thil dik lote enfiah a, a ṭul anga hma la turin an ngen.

PRISM chuan, AMC-in thil danga mipui tilungawi lo khawpa sum hmuhna tura ṭhahnem a ngaih laiin, Aizawla motor parking fee khawn tur a thlannaah khawpui hmakhaw ngaihna awm loin thil an ti niin an ziak a, "Thuneitute duhsak zawngte siam len tumna vangin an sum hmuh theih tur cheng nuai 32 chuang an chán dawn a ni," an ti.

PRISM tarlan danin, kum 2016-17 chhunga parking fee khawn tur thlanna tender chu mi 352-in an chháng a, chhangtu zinga mi pakua chu area number ziah loh vangin hnâwl an ni. Chhanna enfiah hnuah chhanna 95 an hnâwl leh a, chhanna nung 248 a awm. Parking fee khawnna tur area 58 a awm a, area pahnih chu chhangtu an awm lo a, area 56-ah parking fee khawntu tur thlan a ni.

Chhanna nungte chu an hming, address leh chhanna zat Comparative Statement siamin an tarlang a, statement-ah chuan chhân san dan indawt tarlan a ni. AMC-a chuan area 56 zinga 34 (60.71%)-ah a chháng sang ber thlang loin chhang hniam zawk an thlang a, area 24 (42.85%)-ah a chháng hniam ber an thlang.

Parking fee khawn tur thlannaah duhsak zawngte an thlan avangin AMC chuan kum khatah Rs. 32,21,040 a hloh dawn tih sawiin, PRISM chuan, "Mipui zah lohna leh dan palzûtna nasa takah kan ngai," an ti.