Mizo hnam himna leh damna atan Hma kan la zel dawn: Champhai MZP

MZP headquarters, Champhai chuan thuchhuah siamin, Champhaiah dan ang thlapa hnam dang an awm theih nan hmalak zel an tum thu an tarlang a, "Mizo hnam himna atan leh damna atan theihtawpa hmalak zel kan tum a ni," an ti.

Champhai MZP chuan, Champhaia hnam dang ILP neia khawsa zat leh sponsor-tu zat hriat ṭha an tih thu sawiin, "Danin a phal angin RTI Act hmangin kum 2015 aṭanga vawiin thlenga Champhaia thla tin ILP pek chhuah zat leh a sponsor-tute DC Office-ah dil a ni. ILP hi thla ruk chauh a dam avangin RTI hmanga zawhna chhanna ni 30 chhunga pek chhuah tur aṭang hian Champhaia hnam dang awm zat leh a sponsor-tute hriat chian ngei kan inbeisei," an ti a; ILP endik kawnga an hmalaknaah Mizo tu pawhin an ṭanpui an beisei thu an sawi.

Champhai mipuite an hming hawha hnam dang sumdawntir lo tur leh sponsor-na aṭanga hlâwk-na tél lo turin Champhai MZP chuan an ngen a, chutiang ti an awm chuan MZP hriattir vat turin mipui an ngen bawk.