Jail táng tlan chhuak man a ni

July 15, 2016-a Aizawl District Jail aṭanga tlân chhuak, Chawngneihsanga (23) chu July 26 tlai khan Ngopa police-te'n an checkgate-ah an man.

Thu dawn danin, Chawngneihsanga hi 207 pick up-ah a chuang a, Ngopa police checkgate-ah police-te'n an endik laiin a hmai a tuam tlat avang leh a chêt danah an rinhlelh avangin thu zawhfiah atan an la a; thu zawhfiah a nih hnuah District Jail aṭanga tlan chhuak a ni tih finfiah a ni.

Chawngneihsanga hi Thawh-lehni zan khan Ngopa Police Station-ah an kawl a, nimin khan Aizawl District Jail hnathawkte'n Ngopa hi an thleng a, jail táng tlan chhuak ngei a ni tih an finfiah hnuah Aizawl an panpui nghal.

Chawngneihsanga hi rûkrûk thubuai vangin District Jail-ah hian a táng a, thla thum táng tur leh Rs. 5,000 chawi tura hrem niin, a tlan chhuah hma hian thla khat tàn a la hmabak a ni.

Hetih lai hian, tualthah thubuai avanga Central Jail aṭang--
a tlan chhuak Lalrindika (26) leh naupang kum tlinglo pawngsuala puh a nih avanga man hnua Thingsai lock up aṭanga tlân chhuak Biakmawia (40) chu man an la ni lo a, police-te'n an zawng mek zel a ni.