Court-in Col.Jasjit Singh zin chhuah remti

Rangkachak tawlhruk suam thubuaia man, 39th. Assam Rifles commandant hlui, Col. Jasjit Singh chuan a nu leh pate tlawh tura Mizoram chhuahsan a dil a, nimin khan Aizawl Addl. District & Session judge Vanlalenmawia'n a phalsak.

Thu dawn danin, Col. Jasjit Singh hian Chandigarh-a ACE Heart and Vascular Institute-a enkawl mek a pa leh tun hnaia cancer vei tih hmuhchhuah a nu tlawh phalsak turin Court a dil a; a dilna chu nimin khan Aizawl Addl. District & Session Court-ah ngaihtuah niin, Judge chuan remti a ni.

Court thutlukna angin, Col. Jasjit Singh hi kumin August thla chhung Mizoram chhuahsan phalsak a ni a; Mizoram a chhuahsan chhungin Court-in emaw, thubuai chhuitu Special Investigation Team-in emaw ṭul an tih chuan an ko thei dawn thung.

Tarlan tawh angin, December 14, 2015 zana Melthum dai, Zampuimanga lungphun bula rangkachak tawlhruk suam thubuaiah Col. Jasjit Singh hi kumin May 5, 2016-ah man a ni a, May 18-ah Central Jail-a dah a ni. Bail-a chhuah a dilna chu May 31 khan remtih a ni a; he thubuaia man mi 14-te chu an vaiin bail-in an chhuak vek tawh a ni.