Myanmar vawk dân anga lâk a ni lo April 2016 hnuah vawk 3,508 thi tawh

Animal Husbandry & Veteri-nary department hotute chuan, NLUP hnuaia sem tur vawk, Myanmar aṭanga lak luhnaah dan anga thil tih a awm loh thu leh, Myanmar aṭanga vawk lak luh chu sorkar hotute thutlukna anga tih a nih thu an sawi. Kumin April leh July 27 thleng khan AH&Vety chuan Mizoramah vawk thi 3,508 an chhinchhiah tawh.

AH&Vety director Dr Saingura Sailo leh hotu dangte chuan nimin khan Aizawl Press Club-ah thuthar thehdarhtute an kâwm a; Mizorama Porcine Reproductive and Respiratory Syndrome (PRRS) leng chungchang press mite an hrilhfiah.

Myanmar aṭanga vawk lak luh chu dan ang leh sorkar laipui phalna anga tih a nih leh nih loh zawhna chhangin, AH&Vety hotute chuan, "Vawkte lak luh hrim hrim hi dan leh hrai hnuaia tih a ni lo. India leh Myanmar insumdawn tawn theihna item-ah ran hrim hrim a tel lo," a ti a; vawkte la luttuin Myanmar ram chhung khawi aṭanga a lak nge tih an hriatpui loh thu a sawi.

Vawk lak luh chhan zawhna chhangin, Vety department hotute chuan, "Vawkte sem turin harsatna a awm a, NLUP hnuaiah kan sem thei lawk lo a. A in sakna sem a ni tawh a, a dawng turte'n a in tur an sak zawhna a rei tawh a, vawk dawn an duh tawh em em a. Chief Minister chair-na hnuaia High Level Committee an ṭhu a; Champhai leh a chhehvel
aṭangin lâk a, sem ni rawh se, an ti a. Hmanhmawh taka sem a ngaih avangin kan sem ta a ni," an ti.

AH&Vety hotute chuan, Myanmar aṭanga vawk lak luhte chu endik (screening) tura tih ni mah se, an endik vek lo tih an sawi a, "Lak luh hmasak ber 500 endik a ni a, a hnuah 537 endik leh a ni a, chu'ng zingah chuan pakhat chiah a positive (PRRS vei) a ni," an ti a; vawkte la luttu (supplier) chu C Vanlalhmuaka, Champhai Zotlang a nih thu an sawi.

Vety department hotute sawi danin, C Vanlalhmuaka hnena vawkte lak luh phalna (licence) pek chu AH&Vety department pek a ni lo a, an hriatpui lo. C Vanlalhmuaka hian ṭum khatah vawkte 800-1000 inkar a la ṭhin.

Dr Saingura Sailo chuan, kumin April thla tir lama Champhai district-ah vawk thi an awm nual tih an hriat veleh sample lain, Vety College, Selesihah enfiahtir a ni a, PRRS vei an ni tih finfiah a nih thu a sawi a, "PRRS a leng tih hriat a nih veleh hma la bik turin Rapid Response Team din a ni," a ti.

AH&Vety Director chuan, PRRS chu Champhai, Lunglei, Lawng-tlai, Siaha, Serchhip, Kolasib leh Aizawl district-ahte hmuh a nih thu a sawi a, "Kolasib leh Mamit district-ah a lên kan la hre lo. Aizawl district-ah chuan Chamring leh Saitualahte hmuh a ni," a ti.

PRRS chu sanghalin an vei ve thei a, ran dang zawngin an vei theih loh bakah, mihringah kai ve theih a ni lo tih a sawi.

Vety department hotute sawi danin, PRRS chu kum 2013-ah Mizoram leh Myanmar-ah a léng tawh a, chuvang chuan sorkar laipuiin Myanmar aṭanga vawk lak luh titawp nghal turin a rawn hriattir bakah, Mizorama vawk zawng zawng endik turin a rawn ti. PRRS vei vawkte chu suat vek tura tiin, zangnadawmna pek tur pawh a ruahman a; mahse, zangnadawmna atana sum dah erawh a tlem hle a ni.

Zawhna chhangin, Dr Saingura chuan, natna vanga thi vawk neitute chu zangnadawmna pek an nih theih nan Central-ah dilna an thlen tawh thu a sawi.

Kumina PRRS lêng chu Myan-mar aṭanga vawk lak luhin PRRS an vei vang a nih leh nih loh hriat chian a nih loh thu sawiin, Vety department hotute chuan, "Kum 2013-ah a lêng tawh a, Mizorama awm reng, tun hnaia rawn lang leh ta pawh a ni thei," an ti.

AH&Vety hotute sawi danin, Zokhawthar leh Melbûkah check post (quarantine) an nei a, natna vei leh vei lo an enfiah ṭhin a, a hriselte chu certificate an pe ṭhin.

Enfiahnaah Rs. 50 chawi a ngaih avangin vawkte la luttute'n check post-te chu an hêl ṭhin thu an sawi a; certificate an pek chu vawkte lak luh theihna licence a nih loh thu an sawi bawk.

Vety doctor-te chuan, PRRS natna thattu damdawi a awm lo tih an sawi rualin, "A control theihna damdawi erawh a awm. HIV/AIDS veite ei ṭhin ART damdawi ang deuh a ni," an ti a; PRRS vei vawkte chu tihhlum a, phûm a ṭhat ber thu an sawi.

Tun hnaia vawk thi zat

District Thi zat

Aizawl 138

Champhai 2,521

Lunglei 338

Saiha 44

Lawngtlai 50

Serchhip 415