UDPA deptt-in Nov. 2016-ah e-office nih tum

UDPA minister Zodintluanga chuan, Mizorama e-office hmasa ber nih tumin UDPA department-in ṭan an lak mek tih a sawi a, "November 2016-ah e-office-a inleh hman ngei kan tum," a ti.

Nimina a pisa-a meeting-ah Zodintluanga chuan, "Mizorama e-office hmasa ber nih tumin theihtawp kan chhuah a, thla thum chhunga inbuatsaih fel hman kan beisei. November thla tirah UDPA Secretariat leh Directorate chu e-office-a leh hman ngei kan tum a ni," a ti a; an department e-office-a an leh theih chuan department dangte tan pawh e-office ni turin awlsamna a siam a beisei thu a sawi.

Meeting-ah hian UDPA, Infor-mation & Communication Techno-logy (ICT) department leh National Informatics Centre hotute an tel a; e-office nei tura tih tur ṭul zawng zawng chak taka bawhzuiin, review meeting pawh thla tin neih
ṭha an ti. Department lamin tih tur an neihte thla khat chhunga tihfel tura tih a ni a, sorkar laipuia bawhzui ngaite chu NIC kutah dah a ni.

Sorkar thuchhuah tarlan danin, e-office hi a taka kalpui theih a nih hun chuan sorkar hnathawh dan a ṭha zawngin nasa takin a her danglam dawn a. Dawhkân pakhat
aṭanga dawhkân danga file ken kual ngai tawh loin, computer hmangin awlsam takin thawn kual a ni ang a; data leh hriat tur pawimawh reng reng file hai chiam ngai loin awlsam taka hmeh chhuah mai theihin a awm tawh dawn a ni.

State Data Centre hmang
ṭangkaiin directorate office-a dawh-kân tinte leh Secretariat office an inthlun zawm ang a, file kal reng reng lehkhaa chhut chhuaha ken kual ngai loin, e-file hmangin computer-ah lehkhate hi an inthawn thei dawn a ni.