Geneva-a UN inkhawmpuia kal ZORO aiawhte'n report an pe

United Nation Organisation (UNO)-in, June 11-15, 2016 chhunga Geneva, Switzerland-a Expert Mechanism on The Rights of Indigenous Peoples an buatsaiha Zo Reunification Organisation (ZORO) aiawha telte chuan nimin khan Aizawl Press Club-ah thuthar thehdarhtute kâwmin, inkhawmpuia an thil tawnte an sawi.

ZORO patron Lalrinliana Sailo, MLA chuan, Zo hnah-thlakte inzawmkhawmna turin rual û zawkte'n thâ leh zung, sum leh pai tam tak an sêng tih sawiin, "Kan mission ber chu rual úte'n Zo hnahthlak inzawmkhawmna tura an lo beih tawhna chhunzawm a ni. Indigenous people tam tak kan awm a, an awmna sorkar leh UNO pawhin hnam khat hmun hrang hranga awmte rorelna khat hnuaia an awm theihna tur an tuipui hle," a ti.

Lalrinliana Sailo chuan, inkhawmpuia an thil tawn chu a hlimawm a, a phûr phah hle tih sawiin, "Inzawmkhawm hi UNO-in a tuipui a, tuna tih theih nghal mai a nih loh pawhin thunung a ni tih ka hmu," a ti a; Zo hnahthlakte inzawmkhawm a, rorelna pakhat hnuaia awm chu Mizorama political party hrang hrangte pawhin an tuipui tih a sawi.

Lalrinliana Sailo sawi danin, an duh ber chu indigenous-te'n dikna chanvo an neih hrênbeh an nihna ata tâl chhuah a ni.

ZORO patron dang Lalruatkima, MLA pawhin, ZORO thil buaipui chu Zofate politics, Mizote hmalam hun khawih a nih thu sawiin, "Zo hnahthlakte inzawmkhawm hi political party zawng zawngin an pawm a, a hlawhtlin hun an nghakhlel vek a ni," a ti.

Lalruatkima sawi danin, inkhawmpuiah hian UN leh ram hrang hranga indigenous people-te'n rorelna pakhat hnuaia an hmalak tawh dan te, an hmachhawp te, harsatna an tawh te, sorkarin a tih tur a tihte leh la tih lohte an sawi. ZORO aiawha kalte pawhin thil chi hrang hrang an thlen ve a ni.

Lalruatkima chuan, environment tihchhiat mek a nih thu te, international boundary-in Zo hnah-thlakte a dáidante awlsam zawka intlawhpawh theihna an duh thu te, Mizoram chu remna awmna ram a nih avangin Zone of Peace Center atan a remchan thute leh, indigenous people-te eizawnna tihchhiat mek a nih thute khawmpuiah hian an thlen thu a sawi.