Khauh zawka ILP kalpui turin ngen

MZP chuan thuchhuah siamin, July 25, 2016-a Vairengte V/C, tlawmngai pawl hruaitute leh Lailapur Panchayat-te'n Lailapur-a joint meeting an neihah inhriatthiam-na nena ILP thlahdul deuh an duh thu an thlen chu hriatthiam harsa an tih thu an tarlang a; ILP chu thlahdul loa khauh zawka kalpui turin thuneitute an ngen.

MZP tarlan danin, July 25-a Lailapur-a inkawmnaah hian Lailapur Panchayat leh Lailapur NGO aiawhte'n Inner Line Permit (ILP) chu inhriatthiamna nena thlahdul deuh an duh thu an sawi a; ILP tel loin Vairengte IOC Veng kal theih a nih theih nan hmalakpui turin Vairengte khawtlang hruai-tute an ngen a ni.

Mizoramah khualzin phur chi rêl lian a luh tawh avangin hnam dang tam zawkin awlsam zawkin Mizoram an luh theih phah tawh tih sawiin, MZP chuan, "India danpuiin a bik taka min humhalhna dan ILP hi a nihna ang taka hmang tur leh a pek chhuah danah fimkhur leh zuala kalpui turin thuneitute kan ngen a ni," an ti.

MZP chuan, Mizorama dan loa hnam dang awm, ILP nei lo, hnam dang sumdawngte leh Mizo hming hawha sumdawngte a ṭul angin an dap zel dawn tih an tarlang bawk a; chumi kawngah chuan Mizo mipui thlawpna an ngen a ni.