Greater Lunglei Water Supply Scheme tui lakna enfiah

PHE secretary V Lalremthanga chuan, nimin khan Lunglei leh a chhehvel mipui châwmtu Greater Lunglei Water Supply Scheme bunna Tlawng lui a tlawh a; tui lak kawnga harsatna hrang hrang an tawhte sutkian dan tur a enfiah.

V Lalremthanga chuan, Lunglei khawpui leh a chhehvel châwmtu Tlawng lui chuan ṭhál laia tui khamkhawp a pek theih tawh loh avangin Mat lui aṭanga tui la turin chak zawka hmalak a nih thu a sawi.

Lungleia PHE hotute chuan, tun dinhmunah Tlawng luia tui pump chhuahna pipe lian a
ṭhat tawh loh avangin tui pump hun chhung darkar sawmin a rei phah thu leh, siamṭhat a nih chuan diesel leh power-ah sum sen a tlem zawk tur thu PHE Secretary an hrilh.

Lungleiah hian tui connection 11,764 a awm mek a, ni tin in mi pakhat tan tui litre 40 ang zel pek a ni. Tui bill aṭangin thla tin cheng nuai 23 an hmu ṭhin.